ایران د «قدیر» په نوم د نوي اوږد واټنه توغندي بریالۍ ازموینه کړې

کابل ټکی کام (پنجشنبه، ۴ چنګاښ، ۱۴۰۵ل)
ایراني رسنیو راپور ورکړی، چې ایران د «قدیر» په نوم نوی توغندی په بریالیتوب سره ازمویلی دی. د راپورونو له مخې، دغه توغندی د جامدو سون توکو پر بنسټ فعالیت کوي او د ۳۰۰۰ څخه تر ۴۵۰۰ کیلومترو پورې واټن کې هدفونه په نښه کولای شي.
د خپرو شویو معلوماتو له مخې، دغه نوی توغندی د ایران د توغندیزو وړتیاوو د پراختیا په لړ کې ازمویل شوی او د جامدو سون توکو کارول پکې د چټک چمتووالي او توغولو وړتیا زیاتوي. پوځي شنونکي وایي چې د جامدو سون توکو لرونکي توغندي د مایع سون توکو په پرتله په لنډ وخت کې د کارونې لپاره چمتو کېږي او د کشف او مخنیوي احتمال یې هم کم وي.
راپورونه زیاتوي چې ایران د توغندیزو او دفاعي تجهیزاتو د تولید پراخ صنعتي بنسټ لري او په دې برخه کې له ګڼو صنعتي او تخنیکي شرکتونو څخه ګټه اخلي. د ایران د توغندیز پروګرام پراختیا په وروستیو کلونو کې د دې هېواد د دفاعي ستراتیژۍ مهمه برخه ګڼل شوې ده.
تر اوسه د دغه توغندي د ازموینې په اړه د نړیوالو سرچینو له لوري بشپړ جزئیات نه دي خپاره شوي، خو د ایران دولتي رسنیو دا ازموینه د هېواد د دفاعي توان د پیاوړتیا لپاره مهم ګام بللی دی.