طالبان وایي، د کندز خان اباد کې یې افغان عسکرو ته درنده مرګ ژوبله اړولې

کابل ټکی کام ۱۱غويي/۱۳۹۵، احمدالله مهاجر
د طالبانو له لورې په خپره شوې اعلامیه کې راغلي دي، چې د کندز ولایت په خان اباد ولسوالۍ کې یې افغان عسکرو ته درنده مرګ ژوبله اړولې ده.
طالبانو ویلي دي، چې نن ماسپښين شاوخوا ۱ بجه د دغې ولسوالۍ اړوند په دوکان آدم خان سیمه کې د دوی جنګیالیو پر افغان عسکرو بریدونه ترسره کړل، چې مقابل لوري ته یې درانده تلفات واړول.
طالبانو د وژل شویو عسکرو کره شمېره نه ده څرګنده کړې.
طالبانو همدا راز ویلي دي، چې په جګړه کې یې ۲ عرادې ټانګونه، ۱ عراده امبولانس چې د وژل شویو عسکرو د لېږد په موخه راغلی وو، له منځه وړي دي.
طالبان زیاتوي، چې په نښته کې یې جنګیالیو ته کوم زیان نه دی اوښتی.