هلمند ولایتي شورا: که ولایت ته تازه دمي سرتیري ونه رسیږي، لښکرګاه سقوط کوي
کابل ټکی کام ۱۰غبرګولي/۱۳۹۵، احمدالله مهاجر
د هلمند ولایتي شورا مرکزي حکومت ته خبردارۍ ورکړی دی، که ولایت ته تازه دمي سرتیري او هوايي ملاتړ ونه رسیږي، لښکرګاه سقوط کوي.
د ولایتي شورا رئیس ښاغلي کریم اتل په ډېره جدي توګه له مرکزي دولت څخه غوښتنه وکړه، تر څو د ولایت مرکز لښکرګاه او د مرکزي ولسوالیو د ساتنې لپاره تازه دمي سرتیري ولایت ته واستوي.
د پولیسو یوې سرچینې رسنیو ته د نوم نه ښودلو په شرط ویلي دي، چې په تېرو دوو شپو کې د هلمند ولایت په ګرشک ولسوالۍ کې ۱۸ پولیس د طالبانو له خوا وژل شوي دي، او ۱۵ نور ټپيان دي.
سرچینې همدا راز ښکاره کړه، د نادعلي په شاول سیمه کې چې طالبانو له سختو کارنده بریدونو وروسته ونیوله، وړمه شپه پکې ۱۷ پولیس ووژل شول، ۷ نور ټپيان شول، او ۸ نور ورک دي.
د هلمند ولایت د والي ویاند عمر ځواک افغان ځواکونو ته مرګ ژوبله تأییدوي، خو له کره شمېرې ناخبره دی.
د یادولو ده، د هلمند ولایت ډېری سیمې د طالبانو په لاس کې دي، چې په ډېرو کمو ساحو کې افغان ځواکونه واکمن دي، طالبان د دغو سیمو په نیولو سره کولی شي، چې ټول هلمند ته سقوط ورکړي.
