کابل ټکی کام ۰۷میزان/۱۳۹۴
راپور: فرید احمد
طالبانو پرون د کندز په ولایت له دریو خواوو یو ناتاره برید پیل کړ چې د څو ساعتونو په ترڅ کې یې دغه مهم سټراټیجیک ښار په خپله ولکه کې راووست.
ددې ولایت په نیولو سره طالبانو څه دپاسه ۸۰۰ زندانیان ازاد کړل، چې ۲۶۰ يې خپل ملګري دي، همداشان په لسهاوو رېنجرې او ټانګونه، په زرګونو توپونه، درنې او سپکې وسلې یې لاس ته لوېدلي دي.
له کندز څخه زمونږ یو همکار ویلي دي چې په بانکونو کې زیاتې پيسې هم لاس ته ورغلي دي.
د کندز د نیولو سره سمدلاسه طالبانو د تخار ولایت اشکمش ولسوالي ونیوله او ورپسې يې د همدې ولایت د بنګي کلا د ولسوالۍ د نیولو خبر هم ورکړ.
حکومتي چارواکو د کندز ولایت او اشکمش ولسوالۍ د لاسه ورکول تائید کړي دي، او ویلي یې دي چې دا د ګاونډیو استخباراتي کړیو جنګ دی، چې د افغان حکومت په خلاف یې روان کړی دی.
د یادونې وړ ده چې په کندز ولایت کې ټول قومونه د ازبکو او تاجکو په شمول له طالبانو ډېر خوښ دي او په هره برخه کې له طالبانو سره همکاري کوي، یو وتلي تجزیه نګار ادریس هم دا خبره تائید کړې ده چې طالبان په سیمه کې له هر قسمه همکارۍ څخه برخورداره دي، او له دولتي چارواکو څخه خلک سخت نفرت ځکه لري چې هغوی د ملت غم نه بلکې د جیبونو ډکولو هڅې کوي.
