کابل ټکی کام ۱۳۹۵ چنګاښ ۴ زرغون خوږیاڼی
له اروپايي ټولنې څخه د بریتانیا د ټولپوښتنې لومړنۍ پایلې ښيي، چې ډېری رای اچوونکو د اروپايي ټولنې نه د وتلو لپاره رایې اچولي.
پرون د پنجشنبې په ورځ د برتانیه په وخت د سهار ۷ بجې په ټوله بریتانیا کې د اروپایي ټولنې د غړیتوب او یا د اروپايي ټولنې څخه د وتو په تړاو د رایې اخستنې مرکزونو خپل کار پیل کړ.
۴۸ سلنې رای اچوونکو اروپايي ټولنه کې د پاتې کېدو او ۵۲ سلنې د وتلو په پلوۍ رایې ورکړي دي.
د نیوکاسل د ښار اوسېدونکو ۹۸ سلنه او د ساندرلند اوسېدنکو ۶۱ سلنه رایې د اروپايي ټولنې څخه د وتولو لپاره رایې ورکړي.
د لومړنیو پایلو په اعلانېدو سره د ډالر په مقابل کې د پونډ ارزښت ۱٫۴ ډالره راټیټ شوی.
اقتصاد پوهان وايي: دا له ۱۹۸۴ میلادي کال راهیسې د پونډ تر ټولو ډېر رالوېدلی ارزښت دی.
د بریتانیا د قوانیو له مخې، په هر ډول رایه اچونه کې د ګډون لپاره لازمه ده په شرایطو برابرو کسانو، چې مخکې له مخکې یې په سیمه ییزو مرکزونو کې نوم لیکنه کړې وي، رایه واچوي.
د خپرو شویو شمېرو له مخې، نژدې ۴۶ میلیون او ۵۰۰ زره کسانو په دغه ټولپوښتنه کې د ګډون لپاره نوم لیکنه کړې، چې په خپل ډول کې ریکارډ بلل کېږي.
ویل کیږي، چې د بریتانیا نفوس اوسمهال تر ۶۵ میلیونو او ۱۰۰ زروڅخه ډېر اټکل شوی دی.
په اروپایي ټولنه کې د بریتانیا د غړیتوب په اړه ټولپوښتنه په ۲۰۱۵ کال کې د لومړي وزیر ډېوېډ کامرون په مشرۍ د واکمن محافظه کار ګوند له ټاکنیزو پروګرامونو څخه و.
بریتانیا په ۱۹۷۳ کال کې د “اروپا اقتصادي ټولنې” غړی شو او په دې بنسټ کې غړیتوب، چې وروسته یې نوم اروپایي ټولنې ته واوښت، په ۱۹۷۵ کال کې ټولپوښتنې ته وړاندې شو او په ۶۷ سلنه رایو د خلکو د منلو وړ وګرځېد.
اټکل دی، چې د پایلو په بشپړېدو سره به له اروپا او نورې نړۍ سره د بریتانیا په اړیکو کې بدلون راشي.
