بدخشان: د خاش ولسوالۍ مرکز د طالبانو تر کلکې محاصرې لاندې دی

کابل ټکی کام ۲۸چنګاښ/۱۳۹۵، احمدالله مهاجر
طالبانو د بدخشان ولایت د خاش ولسوالۍ د ټولو پوستو له نیولو وروسته، دا مهال د دغې ولسوالۍ مرکز تر کلکې محاصرې لاندې راوستی دی.
طالبانو په یوه خبرپاڼه کې ویلي دي، چې له پرون ناوخته څخه د شپې تر ناوخته پورې د دغې ولسوالۍ پر ټولو امنیتي پوستو، د اربکیانو پر مرکزونو او قرارګاوو پراخ بریدونه ترسره شول.
طالبانو د یوې خبرپاڼې په خپرولو سره ویلي دي، چې د شپې تر لسو بجو پورې یې د دغې ولسوالۍ ټولې پوستې، اړوند کلي، د اربکیانو مراکز او قرارګاوې نیولي دي.
طالبان وایي:
«همدا راز د خاش ولسوالۍ د (سرلوله، بقلک، کج ګردن، تاجکان، کزرها او ظلم آباد، او د جرم ولسوالۍ اړوند د کمالینګ، یباب اوسوچ) سیمې د دښمن له کرغیړن وجود څخه په ټولیزه توګه پاکې شوي.».
د طالبانو د خبرپاڼې له مخې چې په دغو نښتو کې یې ګڼو عسکرو، پولیسو او اربکیانو ته مرګ ژوبله اړولې ده، او ګڼې سپکې او درندې وسلې یې نیولي دی.
د یادولو ده، د خاش ولسوالۍ مرکزي ودانۍ له تېرې شپې راهیسې د طالبانو له لورې تر کلکې محاصرې لاندې ده، چې ګڼ عسکر او پولیس پکې محاصره دي او ټولې لارې پرې قطع شوي دي.