ایران ۲۱ سنیان په دار ځړولي
( کابل ټکی کام ۱۳۹۵ زمری ۱۳) زرغون خوږیاڼی
ایراني چارواکو العربیة رسنۍ ته ویلي، چې پرون سهار د رجايي ښار د جوهر دشت سیمې په زندان کې، ۲۱ سیاسي سني بندیان په دار وځړول.
جوهر دشت سیمه د ایران د پلازمېنې تهران په جنوب لویديځ کې پرته ده.
په زندانیانو کې شهرام احمدي په نوم یوه ښځه هم وه، چې اسلام ته د بلنې په تور نیول شوې وه، په دار وځړول شوه.
ددې بندیانو وارثانو(مور او پلار) ته د خپلو اولادونو سره د وروستۍ لیدنې لپاره اجازه ورکړل شوه، د بندیانو وارثانو په ایران کلکه نیوکه کړې ، چې ددوی اولادونه یې یواځې په دې تور نیولي، چې سني مذهبه دي.
ایراني چارواکو ویلي، چې ۱۷ سني سیاسي زندنیا هم د ورته برخلیک په تمه دي او ډېر زر به په دار وځړول شي.
ایراني رسنیو د ۱۸ په دار ځړول شوو سني زندانیانو نومونه هم خپاره کړي، چې لاندې کسان په کې دي:
۱-احمد نصيري ۲- ادريس نعمتي ۳- آرش شريفي ۴- پوريا محمدي ۵- عبدالرحمان سنكاني ۶- نصرالله مرادي۷- بهروز شاه نظري۸- بهمن رحيمي ۹- عالم برماشتي ۱۰- طالب ملكي ۱۱- شهرام احمدي ۱۲- سيد شاهو ابراهيمي ۱۳- تيمورنادري زاده ۱۴- فرزاد شاه نظري ۱۵- كاوه ويسي۱۶-كاوه شريفي۱۷-فرشيد ناصري۱۸- فرزاد هنرجو.
ایراني چارواکو ویلي، چې د جوهر دشت زندان باندې د پولیسو لخوا کلک امنیتي تدابير نیول شوي.
چارواکو وویل: ((۱۷ تنه نور زندانیان مو یو نا څرګند ځاي ته د زړولو لپاره لیږلي)).
په دغو بندیانو کې د ځینو عمرونه تر ۱۸ کلونو کم ښودل شوي دي، چې په دار ځړولو محکوم دي.
د ایران د استخباراتو وزارت په یو خبر پاڼه کې لیکلي، چې په دار ځړول شوي کسانو د ۲۰۰۹ز کال راهیسې د ایران په کردستان او د ایران په غرب کې د ایران د دولت په خلاف فعالیتونه کول او اکثره یې له سلفي مذهب سره تړاو لري، چې د ایران په بلوچستان کې به یې خلکو ته د سلفیت بلنه ورکوله.
بلخوا په ایران کې هم ازادو رسنیو د ایران په دې کار کلکه نیوکه کړې ده او دا یې د بشر ضد ستر جنایت بللی دی، دوی د حقوق بشر په نړۍ والې ادارې غږ وکړ، چې په ایران کې د دار ځړولو بشر ضد جنایتو په اړه جدي اقدام وکړي.
تر اوسه پر ۳۷ سني زندانیانو د اعدام حکم شوي چې ۲۱ یې په دار شول او نور به یې سبا په نا څرګند ځای کې په دار وځړول شي.
