(کابل ټکی کام ۱۳۹۵ زمری ۲۰) زرغون خوږیاڼی
د طالبانو والي ملا عبدالمنان اخند د طالبانو له یوې رسمي ویب پاڼې سره په مرکه کې ویلي، چې د لښکرګاه ښار اوسیدونکو ته د ځان او مال د حفاظت ډاډ ورکوو.
د طالبانو والي ویلي، چې لښکرګاه ښار د طالبانو لخوا محاصره شوی دی او اوس د بولان سیمه له مجاهدینو سره ده، چې له ښار څخه ۴ کیلومتره فاصله لري.
والي زیاته کړې ، چې په لښکرګاه ښار کې پر مېشتو ټولو بې طرفه کړیو، خیریه موسساتو او ولسي وګړو باندې غږ کوو، چې تاسو ته به هیڅ ډول ضرر ونه رسیږي، مونږ په ټول توان سره کوښښ کوو، چې ملکي تلفات صفر ته راټيټ کړو او له هیچا څخه هم د انتقام اراده نه لرو، خلکو ته به د باعزته ژوند کولو زمینه برابره کړو.
مجاهدین به تر وروستي حده کوشش وکړي، چې ولسي خلکو ته زیان وانه وړي، دا دمجاهدینو وظیفه ده چې د اولس د خلکو ژوند، مال، عزت او ناموس وساتي(مونږ د هېواد د خپلواکۍ لپاره وسله پورته کړې او د هېواد د اوسیدونکو ساتنه مونږ پر ځان فرض بولو).
طالب والي پر ولسي خلکو غږ کړی،چې له پوځي قرارګاوو او پوستو ځان لري وساتي، مجاهدین پلان لري چې یواځې پوځي مرکزونه خپل هدف وګرځوي.
همدارنګه ملا عبدالمنان پر پولیسو او اردو غږ کړی، چې د نورو مغرضو کړیو د اهدافو لپاره ځانونه مه قربانوئ، وسلې مو کیږدۍ، زمونږ د دعوت او ارشاد کمیسیون غیږه ستاسو لپاره خلاصه ده، مونږ به تاسو تر خپلو کورونو پورې روغ رمټ ورسوو تر څو مو له خپلو بچیانو سره یو ځای شۍ.
د طالبانو والي دا څرګندونې په داسې حال کې کوي، چې د لښکرګاه ښار ته طالب ځواکونه نږدې شوي دي او ځايي خلکو ته دا اندیښنه پيدا شوې ده، چې که ښار د طالبانو په ولکه کې کیوزي له دوی سره به یې برخورد څنګه وي؛ خو د طالبانو والي ولسي خلکو ته د ځان، مال او عزت ساتلو ډاډ ورکړی دی.
