امریکا کې روزل شوی تاجکستانی قومندان د داعش د دفاع وزیر شو
(کابل ټکی کام ۱۳۹۵ وږی ۱۶) عبید هاند
د عراق خبري سرچینو خبر ورکړی، چې د تاجګستان د ځانګړو ځواکونو پخواني قومندان ګلمراد حلیموف چې د جګړې په برخه کې یې په امریکا کې روزنې ترلاسه کړي دي، داعش ډلې د دفاع وزیر په توګه وټاکلو.
ګلمراد حلیموف څه موده وړاندې د داعش ډلې سره یو ځای شو، چې د ابو عمر الشیشاني د وژل کیدو نه وروسته ددغې ډلې د دفاع وزیر شو.
تر دې وړاندي ابوعمرالشیشاني د داعش د دفاع وزیر و، چي څه موده وړاندې د یوه برید پر مهال ووژل شو.
ګلمراد حلیموف د تاجکستان د ځانګړي ګارد او ځواکونو پخوانی مشر و، چې د جګړې په برخه کې د امریکا د بهرنیو چارو، ډیپلوماتیک امنیت او ترهګرۍ ضد ځواکونو لخوا په ځانګړي توګه روزل شوی دی.
ویل کیږي، چې امریکا ګلمراد حلیموف په خپل تور لست کې هم شامل کړی دی.
