امريکا: وسلوال بريد کې ۴ تنه وژل شوي
(کابل ټکی کام ۱۳۹۵تله ۳) الماس خدرخېل
د امريکا په واشنګټن ايالت کې وسلوال بريد شوی، پوليس وايي د دغه ایالت د برلنګټن ښار په یوه پلورنځي کې د ډزو له امله لږ تر لږه ۴ کسان وژل شوي دي.
د پوليسو يو لوړپوړي چارواکي مارک فرانسېس ويلي، چې امنيتي ځواکونه او د بېړنيو مرستو کارکوونکي سيمې ته رسېدلي دي.
پوليس وايي، چې په پېښه کې د ټپي کسانو شمېر لا معلوم نه دی، خو د درملنې لپاره يې نږدې روغتونونو ته لېږدولي دي.
هغه وويل، چې د پېښې له ځای سره نږدې کليسا هم شته، چې د کليسا ټول کسان يې ترې ويستلي دي.
امنيتي ځواکونو د پيښې ځای کلابند کړی او د تښتېدلي بريدګر د نيولو هڅه روانه ده.
پوليسو ويلي، چې دا لا مالومه نه ده چې بريدګر يواځې دی که نور کسان هم ورسره دي.
د يادونې ده، چې تېره شنبه هم د امریکا په نیویارک کې د چاودنې له امله ۲۹ کسان ټپیان شوي و، چې په تړاو يې افغان توکمه احمد خان رحيمي امريکايي ځواکونو ونيو او د چاودنې مسؤليت يې په رسمي توګه د هغه په غاړه واچولو.
