سوريه: د بشار ځواکونو په بمبارۍ کې سلګونه ملکي وګړو ته مرګ ژوبله اوښتې
(کابل ټکی کام ۱۳۹۵تله ۴) الماس خدرخېل
د سوريې په حلب ښارګوټي کې د بشارالاسد او روسي ځواکونو له خوا په بمبارۍ کې تر ۵۰ زيات ملکي کسان وژل شوي او له ۲۰۰ څخه زيات يې ټپیان دي.
په حلب کې د ملکي خوندیتوب د ادارې چارواکو رسینوته ویلي، چې د بشار اسد او روسیې اړوند جنګي الوتکو د حلب د بوستان القصر او مشد قلعې په سیمو کې په ملکي استوګنځایونو درانه هوايي بریدونه وکړل.
د ادارې چارواکي وايي، چې په دې بريدونو کې لږ ترلږه ۵۶ تنه وژل شوي او تر ۲۰۰ څخه زيات يې ټپيان دي. د دوی په وينا په وژل شوو کې يې زياتره ښځې او ماشومان شامل دي.
يادې ادارې دا هم ويلي، چې د بمبارۍ له امله لسګونه ودانۍ ويجاړې شوي، په سيمه کې ډيرې ودانۍ په کنډوالو بدلې شوي او په زيات شمير کسان د نړيدلو ودانيو لاندې دي.
ځايي رسنيو ويلي، چې په ډيرو کمو امکاناتو د پلټنې چارې پیل شوي، خو کيدی شي د مړو شوو شمير تر دې هم زيات شي.
دوی زياتوي، چې په سيمه کې نه نړيوال مرستندويان شته، نه هم ډاکټران. او ټپيان د تداوۍ په موخه يو بيړني روغتون ته انتقال شوي.
د يادونې ده، چې تېره ورځ هم د بشار ځواکونو په هوايي بريدونو کې تر ۸۰ کسانو زيات يې ووژل شول او په سلګونه نور يې ټپيان شول.
ويل کېږي، چې د اسد رژيم د روسيې او ايران په مرسته کوښښ کوي، ترڅو سيمه ونيسي او هلته يو شيعه دولت رامنځته کړي.
