(کابل ټکی کام ۱۳۹۵لړم ۲۵) الماس خدرخېل
د پاکستان يو شمير سياسي ګوندونو د دغه هېواد له مرکزي حکومته غوښتنه کړې، چې په پاکستان کې ميشت د افغان کډوالو د پاتې کېدو موده دې وغځوي او نا راجسټر افغان کډوال دې راجسټر کړي.
په همدې تړاو د پاکستان سیاسي ګوندونو د دغه هېواد د قبایلي او مهاجرینو چارو يا سفران وزارت په انګړ کې د دوشنبې په ورځ یوه ګډه غونډه درلوده، چې د دغه هېواد سياسي ګوندونو غړیو او مشرانو پکې برخه اخستې وه.
له يادې غونډې وروسته د خيبرپښتونخوا وزيراعلي پرويز خټک رسنيو ته وويل: (له مرکزي حکومتهیې غوښتي چې ناراجسټر شوي افغان کډوال دې هم راجسټر کړي، څو هېواد ته د بېرته ستنېدو پر مهال ورسره د نړیوالې ټولنې لهخوا مرسته وشي).
پرويز خټک همداراز وويل، چې د پاکستان حکومت يو کډوال هم په زور خپل ملک ته نه لېږي.
هغه زياته کړه ((موږ کله هم نهدي ویلي چې څوک به په زوره له هېواده وشړو، ځکه چې موږ د نړیوالو معاهدو پابند یو، بلکې زما ستونزه غیر راجسټر شوي افغان کډوال وو، زما په صوبه کې لکونه خلک له قانوني اسنادو او شناخت پرته ګرځي، نو زه څنګه دا خلک وزغمم او زما پولیس به څرنګه دا خلک پرېږدي. نو ما له دوی غوښتي وو چې دوی راجسټر کړي چې خپل هېواد ته د ستنېدو پر مهال خالي لاس لاړ نهشي، بلکې یو څه مرسته ورسره وشي)).
د يادونې ده، چې د پاکستان مرکزي حکومت د روان کال په ستمبر مياشت کې په دې هېواد کې د مېشت راجسټر افغان کډوالو د پاتې کېدو موده د ۲۰۱۷ م کال تر مارچ مياشتې پورې وغځوله.
د پاکستان د سرحدي چارو وزارت سکرټر محمد شهزاد وايي، چې سياسي ګوندونو له مرکزي حکومته د افغان کډوالو د اوسېدنې او افغانانو ته د ويزو ورکولو وړانديزونه کړي، هغه زياته کړه چې د یادو غوښتنو وروستۍ پريکړه به د پارلمان له خوا کېږي.
د UNHCR ادارې د معلوماتو له مخې په دغه هېواد کې ۱۵ لکه راجسټر افغان کډوال ژوند کوي، خو پاکستاني چارواکي وايي، چې تر پنځلس لکه غير راجستر افغان کډوال هم ميشت دي.
