(کابل ټکی کام ۱۳۹۵ لیندۍ ۲۳) زرغون خوږیاڼی
د جنبش غړي او د جوزجان پخواني والي احمد ایشچې ویلي، چې دوستم پر ما د جنسي تیري هڅه وکړه او خپلو ساتونکو ته یې پر ما د جنسي تیري امر وکړ او بربنډ انځورونه یې رانه واخیستل.
احمد ایشچي، چې نږدې یوه میاشت وړاندې د دوستم لخوا برمته شوی و په تازه څرګندونو کې ویلي، چې رشید دوستم لومړی زه خپل کور ته بوتلم او و یې وډبولم، وروسته یې جامې رانه پدې خاطر وویستلې څو ښکاره کړي چې جنسي تیری پرې شوی دی« راته یې وویل لومړی به زه درسره لواطت وکړم».
ښاغلي ایشچي له طلوع تلویزیون سره په مرکه کې څرګنده کړې، چې دوستم زه پر ځمکه وغورځولم او زما پر ستوني یې پښه کیښوده، ښکنځلې او سپکاوی یې راته وکړ.
ایشچي په خپلو خبرو کې وايي، «دوه تنو زه له لاسونو ونیولم او دوه تنو نورو له پښو ونیولم، پښې يې راباندې قاط کړې، لږ تر لږه لس دقیقې کش مکش وشو او د جنسي تیري کوښښ یې کولو، درې ځلې یې نږدې تماس ونیولو او انځورونه یې واخیستل، تر څو سند وي چې هر وخت یې له امر نه سرغړونه کوله یاد انځورونه به ورته ښودل کیږي.
«وروسته یې ستار ته غږ کړ، چې د خپلو لسو تنو ملګرو سره په ده باندې جنسي تیری وکړئ تر څو مقعد یې څیري شي او وینه ترې تویه شي، له وینې یې انځورونه واخلئ او بیا یې ماته وښایۍ».
احمد ایشچي وايي، «وروسته خپله دوستم راغی او زه یې وغورځولم، لاسونه او پښې مې تړلي وو، نو د غوځيدلو پر وخت زما خوله او پوزه په کاشي ولګیدلې، دا کار یې اووه یا اته ځل تکرار کړ، وروسته مې ناڅاپي یو درد حس کړ او غیر ارادي چیغه مې ووهله په همدې وخت کې دوی زه د کلاشینکوف په میل د مقعد سره نږدې وهلی وم او مقعد مې څیرې شوی و، دده په وینا داسې یې ښکاروله چې جنسي تیری راباندې شوی وي او انځورونه یې واخیستل».
ایشچي رسنیو ته ویلي، چې رشید دوستم ۵ ورځې په خپل کور کې بربنډ ساتلی وم.
نوموړی له ولسمشر او د بشري حقوقو له سازمانونو غوښتي دي، چې دده د بشي حقوقو دفاع وکړي، نوموړی وايي که دوستم پر ما د کوم جرم دلیل لري نو مهرباني دې وکړي ودې وايي، غیر له دې پر ما حق نه لري.
په همدې حال کې د اروپا اتحادیه، امریکا ، استرالیا، برطانیه او کاناډا سفارتونو د خبرپاڼو په نشرولو کې د رسمي پلټنو غوښتنه کړې ده، چې د ښاغلي احمد ایشچي په اړه د بشري حقوقو له سرغړونې او په دوستم د لګیدلیو تورونو په اړه دې بې طرفه، عادلانه او شفافه پلټنه وشي.
د امریکايي سفارت لخوا په نشر شوې خبر پاڼه کې ویل شوي، چې د ولسمشر لومړي مرستیال رشید دوستم لخوا د احمد ایشچي په حق کې سرغړونې او بد سلوک د اندیښنې وړ دی.
دوی د افغانستان له حکومت څخه غوښتي دي چې په دې اړه جدي پلټنې وکړي او امریکا ددې پلټنو هرکلی کوي.
همدارنګه د رشید دوستم مطبوعاتي دفتر د ایشچي یادې ادعاوې رد کړي دي او دا یې د یو شمیر نامعلومو کړیو تخریبوونکي تورونه بللي دي، دوی د ځينو ادارو اوسازمانونو( په افغانستان کې د بهرنیو سفارتونو) د خبرپاڼو په اړه خوشینې څرګنده کړې ده.
