(کابل ټکی کام ۱۳۹۵ مرغومی ۶) زرغون خوږیاڼی
د روسیې ولسمشر ولادیمیر پوتین خبریالانو ته په یوه غونډه کې د نسکورې شوې الوتکې او پکې د وژل شویو کسانو سره د خواخوږۍ په پار په ټوله روسیه کې یو ورځينی ملي ماتم اعلان کړ.
تیر ماښام پوتین د پيښې له قربانیانو سره خواخوږي څرګنده کړه او د الوتکې د غورځیدو په اړه یې د بشپړو پلټنو امر وکړ، ولادیمیر پوتین وویل،« سبا په ټوله روسیه کې د ملي ماتم ورځ ده.»
وړمه ورځ سهار وختي د روسي پوځ اړوند یوه ټي یو ۱۵۴ ډوله الوتکه چې د روس له سوچي ښار نه الوتې وه، دوه دقیقې وروسته په تور سمندګي کې پریوتې وه، چې د وروستیو معلوماتو له مخې په الوتکه کې ۹۲ تنه روسي پوځيان او د الوتکې عمله شامل وه چې ټول یې وژل شوي دي.
غورځیدلې الوتکه په سوریه کې د روسي پوځیانو د کرسمس مراسمو کې د ګډون لپاره روانه وه، چې د پوځيانو سربیره د پوځ موسیقۍ ډله هم پکې شامله وه.
د روسیې دفاع وزارت ویاند ایګور کوناشینکوف ویلي، چې تور سمندرګي کې به د دوشنبې په سهار د لویدلې الوتکې په اړه پلټنې پیل شي، په پلټونکو کې ۳ زره کسان ګډون لري، چې ۱۰۹ ته یې لامبو وهونکي دي.
کوناشینکوف وايي، د الوتکې ټول مسافر وژل شوي او د الوتکې د ټوټو او د مړو د پیدا کولو کار یې پیل کړي دي، همدا شیبه څلور بیړۍ او ۵ چورلکې سیمه پلټي، چې د ډرون الوتکې هم ورسره ملې دي.
روسیې په داسې حال کې د جدي شپږمه د ملي ماتم ورځ اعلان کړه، چې ۳۷ کاله وړاندې يې په همدغه ورځ په افغانستان یرغل کړی و.
