روسیه: امریکا ته به جدي سرخوږی جوړ کړو
(کابل ټکی کام ۱۳۹۵ مرغومی ۱۰) زرغون خوږیاڼی
وروسته له هغه چې امریکا د روسیې ۳۵ دیپلوماتان وشړل، روسیې هم د ورته غبرګونونو ګواښ وکړ او ویلي یې دي چې امریکاته به جدي سرخوږی جوړ کړي.
نن د امریکا ولسمشر اوباما د ټاکنو په بهیر کې د روسیې د لاسوهنې په غبرګون کې د روسیې د دوه دیپلوماتیک مرکزونو د تړلو او د ۳۵ روسي دیپلوماتانو د وتلو امر وکړ .
د کرملین د ماڼۍ ویاند دیمیتري پیسکوف ژمنه وکړه، چې د متقابل عمل د اصل له مخې؛ روسیه به په ورته برخو کې امریکا ته “جدي سرخوږی” جوړ کړي.
د روسیې د پارلمان د بهرنیو اړیکو د کمیټې مرستیال الکسي چیپا د اوباما لخوا د روسي دیپلوماتانو د شړولو او دیپلوماتیکو مرکزونو د تړولو په اړه وویل، چې د اوباما اداره د زنکدن په حالت کې قرار لري او هر لورې ته لاس او ښپې اچوي.
الکسي چیپا زیاته کړه، چې د اوباما اداره مخکې له دې څخه چې واک ډونالډ ټرمپ ته وسپاري، د امریکا او روسیې تر منځ اړیکي خرابوي او غواړي چې خنډونه رامنځته کړي.
د روسیې د ولسمشر ولادیمیر پوتین ویاند دیمیتري پسکوف د نوو بندیزونو په اړه وویل، چې د امریکې دا ډول کړنې د کرکې په مانا دي او ددې ترڅنګ دا ډول بندیزونه ناقانونه دي.
