ټرمپ: ژر به د افغانستان په اړه خپله ستراتیژي اعلان کړو
(کابل ټکی کام ۱۳۹۶ زمری ۲۰ فرید افغان)
د امریکایي مشرانو په لوړه کچه د خپلمنځي اختلافاتو چې شاوخوا ۶ میاشتې وخت یې ونیوو اوس یوځل بیا د دې هیواد ولسمشر د افغان جګړې په وړاندې د پالیسۍ د ژر اعلانیدو خبر ورکړی دی.
تره ورځ امریکایي ولسمشر په نیوجرسي ایالت کې په خپل ګلف کلب کې ویلي، چې د افغانستان په اړه پرېکړې کولو ته نږدې شوي دي.
نوموړي ویلي چې افغان جګړه ورته د اوباما او بوش څخه میراثي پاتې او دی هڅه کوي ترڅو هغه ته د پای ټکی کېږدي.
ټرمپ ویلي چې امریکایان نور ددغې جګړې لپاره زغم او وړتیا نه لري.
باید وویل شي چې نوموړي تر دې وړاندې هم په ځلونو د افغان جګړې په اړه د خپلې ستراتيژۍ د اعلان خبره کړې وه، خو د میاشتو په تېرېدو لا هم په سپينه ماڼۍ کې د افغانستان د مسئلې پر سر اختلافات روان دي.
بلخوا د افغانستان ګډحکومت هم د امریکا نوې پالیسۍ ته سترګې په لار دی او په امریکا یې ژغ کړی چې د افغان جګړې په اړه هرڅومره ژر چې وي خپله پالیسي نهایي کړي، حکومت له امریکا غوښتي چې پخپله پالیسي کې دې په وسلوالو ډلو فشارونه ډیر کړي.
د یادونې وړ ده چې د ټرمپ په مشرۍ د امریکا نوې اداره وروسته له هغه چې له اروپایي هیوادونو نا امیده شو په خپله یې د یادې جګړې لپاره مټې رابډوهلې.
د بلک واټر په ګډون یې آن د عسکرو په خروج هم غور وکړ خو لا په یوه داسې کامله تګلاره ندي سلاشوي چې رسنیو ته یې ابلاغ کړي.
