د امریکايي حکومت د لګښتونو څارونکې ادارې په یوه تازه خپاره شوي رپوټ کې ویلي، امریکا له ۲۰۰۲ز کال راهیسې د افغان امنیتي ځواکونو پر وسلو، مخابرو او نورو نظامي مهماتو باندې ۷۶ میلیارده ډالر لګولي دي.
په رپوټ کې ویل شوي، امریکا د افغان ځواکونو ته ۶۰۰۰۰۰ وسلو لپاره فنډونه ځانګړي کړي و. د دې وسلو ۸۱ سلنه برخه توپکونه او تفنګچو جوړوله. د دې ترڅنګ ۲۵۰۰۰ ګرنېټ غورځوونکي او لس زره آر پي جي راکټونه هم ورکول شوي دي.
امریکا همدا راز افغان ځواکونو ته ۱۶۲۶۴۳ مخابرې او شاوخوا ۷۶۰۰۰ موټر او ټانګونه ورکړي دي. افغان ځواکونو ته په ورکړل شویو ګاډو کې اکثره رینجر پیک اپس موټرونه او باروړونکي وسایط وو، خو نظامي موټرو کې ۲۲۰۰۰ هاموي ټانګونه هم وو.
په رپوټ کې ویل شوي، افغانستان ته له رسېدو وروسته دا هر څه پر افغان ملي اردو او ملي پولیسو وېشل شوې دي.
د رپوټ له مخې، پنټاګان له څېړنو وروسته ویلي چې له ۲۰۰۷ز کال راهیسې افغانستان ته ۱۱۰ چورلکې او ۹۸ الوتکې لېږلې شوې دي. په دې الوتکو او چورلکو کې ۳۱۴۰۰۰ راکټونه، ۸۷۰۰ ځانګړي بمونه او د چورلکو ۱۷۱۵۰۰۰ مرمي وړل شوې دي.
خو له دې هر څه سره بیا هم امریکايي او افغان چارواکي وايي چې افغان ځواکونه سم مجهز نه دي او باید لا زیاتې مرستې ورسره وشي. په افغانستان کې د امریکايي ځواکونو قومندان جان نیکولسن د روان کال په پیل کې ویلي و چې افغانستان ته باید څو زره نور امریکايي پوځيان ولېږل شي تر څو افغان ځواکونه وکولای شي طالبانو ته ماتې ورکړي.
د افغان چارواکو په خبره، وسله وال طالبانو ټوله جګړه د افغان ځواکونو پر وسلو پر مخ وړي. د افغان ځواکونو د نظامي مهماتو یوه لویه برخه پر طالبانو پلورل کېږي، او یا یې تسلیمېدونکې افغان سرتېري له ځان سره طالبانو ته وړي.
طالبان د افغان ځواکونو په وسلو جګړه کوي
د امریکا ولسمشر تر دې دمه لا د افغانستان لپاره خپله ستراتیژي نه ده اعلان کړې. ټرمپ پرون رسنیو ته ویلي چې د افغانستان د جګړې په اړه به ډېر ژر خپله پرېکړه وکړي.
د ټرمپ د ستراتیژۍ د ځنډ له امله، تېره ورځ امریکايي سناتور او د کانګرس د وسله والو خدمتونو د کمیټې مشر، جان مککین د افغانستان لپاره خپله پالیسي اعلان کړه. د جان مککین طرحه به په راتلونکې سپټمبر میاشت کې د تصویب لپاره کانګرس ته وړاندې شي او ضروري نه ده چې ټرمپ ورباندې عمل وکړي.
د جان مکین لخوا په طرح شوې ستراتیژۍ کې ټوله تکیه د افغان ځواکونو پر تقویه کولو ده. مککین په خپله طرحه کې ویلي چې افغان حکومت دې له سقوط څخه وژغورل شي او افغان عسکر دې نور هم تقویه کړل شي چې د هغوی له فزیکي شتون څخه په استفادې امریکا په افغانستان کې خپل اهداف خوندي کړي.
مککین همدا راز ټینګار کړی دی چې افغانستان ته دې نور امریکايي پوځیان ولېږل شي او له افغان حکومت سره دې اوږدمهاله تړونونه لاسلیک کړي تر څو امریکا په افغانستان کې دایمي شتون ولري.
د شنونکو په اند، د امریکايي چارواکو له خبرو داسې ښکاري چې له افغان عسکرو پرته امریکا په افغانستان کې جګړه پر مخ نه شي وړلای.
