یوه روسي سناتور ویلي چې په افغانستان کې له ۱۶ کلنې اوږدې جګړې وروسته امریکا ماتې خوړلې او باید له دې هېواده د خپلو پوځونو په ویستلو غور وکړي.
الکسي پوشکوف پر خپل ټوېټر لیکلي چې په افغانستان کې د امریکا جګړه له ماتې سره مخ شوې ده. ”جورج بش جګړه پیل کړه، بارک اوباما یې د ختمولو وعده وکړه خو دا وعده یې پر ځای نه کړه“.
د سناتور په باور په د امریکا د نوي ولسمشر، ډونالډ ټرمپ سیاستونه هم په افغانستان کې له ماتې سره مخ شوي دي او امریکا په نړۍ کې د سوپر پاور له ځایه د لوېدلو په حال کې ده.
پوشکوف دا خبرې وروسته له هغې کوي، چې دوه ورځې وړاندې طالبانو د امریکایي ولسمشر ډونالډ ټرمپ په نوم په یو پرانیستي لیک کې ویلي وؤ چې افغانستان کې یې د ۱۶ کلن پوځي حضور پایله له هېڅ سره برابري دي. ”د ۱۶ کلن پوځي حضور پایله دا شوه چې نن افغانستان په امنیتي لحاظ تر ټولو نا امنه، په اداري لحاظ تر ټولو فاسد او په اقتصادي لحاظ تر ټولو نیستمن هیواد ګڼل کېږي“.
ډونالډ ټرمپ ته د طالبانو پرانيستی ليک
طالبانو په لیک کې له ټرمپه غوښتي و چې د نورو پوځيانو رالېږلو پر ځای دې د ټولو امریکايي پوځيانو د ایستلو ستراتیژي غوره کړي. ”… ښه داده چې د اضافه ځواکونو را لېږلو په ځای د ټولو امریکايي پوځونو د ایستلو ستراتیژي غوره کړئ. یقینا چې دا استراتیژي به مو له يوې خوا د همدی امریکايي پوځیانو د نجات ستراتیژي وي او له بلې خوا به مو د پخوانیو امریکايي چارواکو د اشتباهاتو په جبیره کولو سره د هغوئ جنګي میراث ته د پای ټکی ایښودل وي“.
دامریکا د بهرنیو چارو د وزارت ویاندې، هیټر ناورټ ویلي و چې د طالبانو لیک یې له سره تر پایه لوستی دی. ناورټ ويلي و چې امریکا د افغانستان لپاره په بېلابېلو اپشنونو غور کوي او دا هم ممکنه ده چې له دې هېواده خپل پوځيان وباسي.
څو ورځې وړاندې د افغانستان لپاره د پوتین ځانګړي استازي، ضمیر کابلوف او د روسیې د بهرنیو چارو وزارت هم ویلي وو چې امریکا او ناټو د افغانستان جګړه بایللې ده.
کابلوف ویلي و چې امریکا او ناټو په افغانستان کې ناکام شوي دي او باید له دې هېواده ووځي.
