تېره شپه د کندز ولايت په چهاردره ولسوالۍ کې افغان او امريکايي ځواکونو عمليات کړي، چې له کبله يې پنځو تنوولسي وګړو ته مرګ ژوبله رسېدلې ده.
د چهاردرې ولسوالۍ يوه اوسېدونکي پاچاګل رسنيو ته ویلي چې بېګا شپه ناوخته ګډو ځواکونو د سجانيو په سيمه کې د عامو خلکو په کورونو چاپې واچولې او د يو شمېر کورونو دروازې يې په بمونو والوزولې. نوموړی وايي، چې افغان او بهرنیو عسکرو عام خلک وهلي، ډبولي او د هغوی شتمنۍ او ځينې پيسې یې هم له ځانونو سره وړې دي.
يوې باوري سرچينې کابل ټکی کام ته وويل، چې امريکايي ځواکونو په ياده سيمه کې د ولسي وګړو له پنځو زيات کورونه هم بمبار کړي دي او ولسي وګړو ته په کې مرګ ژوبله اوښتې ده. د سرچينې په وينا، په بمبارۍ کې يوه ميرمن شهیده شوې او د دوو ماشومانو په ګډون دوې نورې ميرمنې ټپيانې شوې دي.
لاندې دوه ماشومان تر خاورو لاندې شوي وو، خو وروسته کلیوالو ژوندي راوایستل.
