نيکې هيلې: د شمالي کوريا بې غوري به دغه هېواد له منځه يوسي
(کابل ټکی کام ۱۳۹۶وږی ۲۷): په ملګرو ملتونو کې د امريکا استازې نيکې هيلې خبرداری ورکړی، چې که د خبرو اترو او دپلوماسۍ له لارې د شمالي کوريا سره لانجه حل نه شي، نو دغه موضوع به له پوځي لارې د امريکا دفاع وزارت ته وسپارل شي.
هيلې امريکايي رسنيو سره په خبرو کې وويل، چې د شمالي کوريا بې غوري او غير مسئولانه چلند به دغه هېواد له منځه يوسي.
هغې زياته کړه، : (که شمالي کوریا همداسې غیر مسؤلانه چلند ته دوام ورکړي او که امریکا متحده ایالتونه په هره لاره د خپل ځان او متحدینو دفاع کوي شمالي کوریا به لهمنځه لاړه شي).
د ملګرو ملتونو امنيت شورا يوه اوونۍ وړاندې پر شمالي کوريا د نويو بنديزونو پريکړه ليک تصويب کړ، چې له مخې يې د دغه هېواد سره په اقتصادي راکړه ورکړه بنديزونه ولګول شول.
خو شمالي کوريا د تازه بنديزونو باوجود د تېرې جمعې په ورځ منځنی واټن بالستيک توغندی وازمايه.
د جنوبي کوریا دفاع وزارت ویلي چې دغه راکټ په ۷۷۰ کېلو متره اعظمي ارتفاع کې ۳۷۰۰ کېلومتره واټن وهلی او په پسفیک سمندر کې د جاپان له ساحلونو ۲۰۰۰ کېلومتره لېرې لوېدلی دی.
د ولسمشر ټرمپ د قهر او غضب د مخکېدونکي خبرادري وروسته، شمالي کوريا ګواښ وکړ، چې د امريکا د پوځي اقدام په صورت کې به جاپان غرق کړي او امريکا به په ايرو بدله کړي.
