خوست: د پوهنې ریاست لپاره څلور پوړیزه ودانۍ پرانستل شوه

کابل ټکی کام ۰۵لېندۍ/۱۳۹۴، احمدالله مهاجر
په خوست کې د پوهنې ریاست لپاره څلور پوړیزه ودانۍ پرانستل شوه.
د دغې ودانۍ ټول مالي لګښت یو ویشت میلیونه، څلور سوه پنځه اتیا زره نهه سوه پنځوس افغانۍ دی، چې په اداري کمپلېکس کې د نړیوال بانک په مالي ملاتړ سره پرانستل شوه.
نن د یو لړ ځانګړو مراسمو په ترڅ کې رسماً د ګټې اخیستنې لپاره وړاندې کړی شوه.
په دغه مراسمو کې د پوهنې رئیس انجینر بخت نور بختیار پخپله وینا کې پر یاده ودانۍ خوښي څرګنده کړه او د ولایتي ادارې له مشرتابه څخه یې په مننې سره وویل چې د پوهنې سکتور ته خاصه توجه لري.
بختیار پخپله وینا کې وویل چې «د پوهنې ریاست یو شمېر مدیریتونو  د اداري تعمیر د نشتوالي له امله په اداري کمپلېکس کې د نورو دولتي ادارو په ودانیو کې خپلې چارې پرمخ وړلې خو له دې وروسته به دوی کولای شي پخپله ودانۍ کې چې ګڼې کاري اسانتیاوې لري خپلې ټولې چارې په اسانۍ سره پرمخ بوزي.»
همدا راز د خوست والي حکم خان حبیبي په مراسمو کې د خپلې وینا په ترڅ کې وویل چې «پوهنه رڼا ده، او ټولنې ته نېکمرغي، سوکالي او د پرمختګ زمینه برابروي، او پخپله وینا کې یې د خوست د خلکو ستاینه وکړه او د علم سره یې د مینې په اړه یې وویل چې دوی پر خپلو نجونو او هلکانو باندې زدکړې کوي»
حبیبي وویل چې په خوست کې درې سوه اته ویشت زره زدکوونکي (هلکان او نجونې) ښونځیو ته د زدکړې لپاره ځي، ده وویل چې دا زمونږ لپاره زیری دی چې په را تلونکي کې به د نړې د نورو ملتونو په څېر د علم لویه سرمایه لاسته راوړي.