(کابل ټکی کام ۱۳۹۶ سلواغه۲۸ فرید افغان)
د قزاقستان ولسمشر نور سلطان نظربایوف نن له“ سي سي ټي وي “ سره په خبرو کې وویل؛ افغانستان ته د سوریې او عراق په جګړو کې د ماتو شويو داعشیانو لیږد خطرناکه موضوع ده او په دې اړه جدي اندیښنه لرو.
نوموړي زیاته کړه؛ داعش ډله کوم خاص قلمرو او ځانګړې سیمه نه لري، خو له یوې سیمې بلې ته په مخفیانه توګه لیږدول کیږي.
د نظربایف په خبره؛ موږ له افغانستان سره د یو شریک ګاونډي په حیث نږدې سوداګریزې او نورې اړیکې لرو او همداراز له همدې طریقه له هند او پاکستان سره هم خپلې تجارتي اړیکې پالو .
د نوموړي په وینا چې دیادې موضوع په تړاو دې دمرکزي اسیا هیوادونه د شانګهای په کنفرانس کې د دې ټوکیدونکې پدیدې د له منځه وړلو لارې وسنجوي.
نظربایوف وویل؛ افغان حکومت کمزوری دی او نه شي کولی له دې هیواد څخه د ورغلې د ګازو او تیلو د نل لیکې امنیت په ښه توګه ونیسي.
قزاقستان داسې مهال دا اندیښنه څرګندوي چې په دې وروستیو کې روسیې هم ویلي و، چې داعش ته ناپیژانده الوتکې اکمالات کوي او افغان حکومت او امریکایي ځواکونه یې پر وړاندې هیڅ ریښتوني عملیات نه دي ترسره کړي.
دا په داسې حال کې ده چې پخواني ولسمشر حامدکرزي واشنګټن پوسټ نه ویلي چې امریکایی ځواکونه د داعش ضده پاڅوانوالو لومړۍ کرښې بمباروي او هغه یې کاملاً امریکایي پروژه بللې وه.
د سیاسي چارو کارپوه وحید مژده رسنیو ته ویلي چې امریکا غواړي د داعش په توسط دسیمې هیوادونو ته چلنجونه او مشکلات پیښ کړي او افغانستان د دې اجرتي جګړه مارو په توسط د جګړو مرکز وګرځوي.
