(کابل ټکی کام، ۱۳۹۷، وری ۲۲) تېره شپه د فراه ولايت د بالابلوک ولسوالۍ په عرف اباد سيمه کې دولتي ځواکونو شپني عمليات کړي، چې پر مهال يې ملکيانو ته مالي او ځاني زيانونه اوښتي دي.
د دفاع وزارت هم دغه عمليات تاييدوي وايي، په فراه کې يې د هوايي بريدونو پر مهال لس وسله وال وژلي او يوولس تنه نور ټپيان دي.
د دفاع وزارت خبرپاڼه کې راغلي، چې د عملياتو پر مهال يې نهه مشکوک کسان هم نيولي دي.
ځايي اوسېدونکي وايي، دولتي ځواکونو د عامو خلکو يو شمير نقليه وسایط سوځولي، شپږ تنه ملکيان يې وژلي او پنځلس تنه نور يې له ځان سره بنديان کړي دي.
طالبانو هم په بالابلوک کې د ملکيانو د وژلو د تاييد سربيره د دولتي ځواکونو دغه ډول کړنې جنايت بللی دی.
يوې باوري سرچينې کابل ټکی کام ته وويل، له پرون راهيسې د فراه ولسوالۍ په اړوندو سيمو کې د دولتي ځواکونو او طالبانو تر منځ درنې نښتې روانې دي.
د سرچينې په وينا، د طالبانو له لوري په عملياتي قوې جګړې او چاودنې کېږي زياتوي چې بالمقابل دولتي ځواکونه له يوې مخې په کليو او ولسي ميشت ځواکونو د غټو وسلو مرمۍ وروي او ځينې کورونه يې هم بمبار کړي دي.
له بالابلوک ولسوالۍ څخه په داسې حال کې د ملکيانود وژل کېدو او عملياتو د پيلولو راپور ورکول کېږي چې تېره ورځ د فراه والي عبدالبصير سالنګي د بالابلوک ولسوالۍ قومي مشرانو ته ګواښ کړی و چې يا دې خپلې سيمې پرېږدي او يا دې د بهرنيو ځواکونو د عملياتو زور ولري.
سالنګي دغه راز وويل، په فراه ولايت کې يې د ګډو ځواکونو په همکارۍ ستر عمليات پيل کړي غواړي چې د دغې ولسوالۍ ټولې سيمې له طالبانو بيرته ونيسي.
