(کابل ټکی کام ۱۳۹۷ وری۲۲)
ولسي جرګه وایي چې د پو هنې وزارت او د دفاع او کورنیو چارو وزارتونو کې لا هم پراخ فساد روان ده.
په ولسي جرګه کې د کابل د خلکو استازی الله ګل مجاهد وایي؛ د پوهنې او کورنیو چارو وزارتونو کې فساد بې کچې زیات شوی، چې د ده په خبره دا فساد د پروژود پیل په مخ کې لوی خنډ ده
د نورستان ولایت استازی احمدالله موحد بیا وایي؛ چې په دې ولایت کې پولیس طالبانو ته له جګړې پرته پوسته پریږدي او د خیالي پولیسو شمیر هم په کې تر بل هر ولایت زیات دی.
نوموړی زیاتوي؛ په دې ولایت کې د هرې پوستې د پرسونل تشکیل تر ۲۰ تنو منظور شوی خو په وینا یې چې هره پوسته کې تر ۵ عسکرو زیات شتون نه لري.
مؤحد همداراز وایي؛ چې په دې ولایت کې امنیتي مسؤلین تر ډیره د ملي امنیت او کورنیو چارو د وزارت له خوا په واسطه بازي او رشوت ټاکل کیږي.
د نوموړي په خبره؛ په همدې ولایت کې میاشت وړاندې د دولتي ځواکونو د مهماتو د یو لوی ډیپو پرسر له طالبانو سره معامله هم وکړه چې وزارتونه هم پرې خبر دي.
بل پلو د غزني استازی محمد عارف رحماني وایي چې ځینې امنیتي مسؤلین بې کچې فساد کې ګیر دي او آن د پولیسو او ملي اردو د اعاشې پیسې هم پټوي.
نوموړی وایي، ډیر کله عسکر یو ټوک ډوډۍ هم نه لري او آن زیات وخت وظیفې ټولولو او په سوال ډوډۍ غوښتلو ته اړ وي ځکه چې د ده خبره د یادو عساکرو اعاشه ټوله لوړ پوړو مقاماتو وهلې وي.
د ولسي جرګې لومړی نایب همایون همایون هم وايي چې د دفاع وزارت په ډیری قراردادونو کې پراخ مالي فساد روان دی چې باید مخه یې ونیول شي
