(کابل ټکی کام، ۱۳۹۷، وری ۲۲) د افغانستان د دفاع وزارت سرپرست ویاند محمد رادمنش د طالبانو څرګندونو ته غبرګون ښودلی او ويلي يې دي چې سوله کوونکو ته به اسانتياوې برابرې کړي او جګړه کوونکو سره به وجنګېږي.
رادمنش زياته کړې، “هغه کسان چې جګړې ته لومړيتوب ورکوي د دوی ځواکونه هم دنده لري چې له خپلې خاورې دفاع وکړي او پر وړاندې يې وجنګېږي خو که څوک سوله کوي دوی يې به يې هرکلی وکړي او هغوی ته به اسانتياوې برابرې کړي”
د طالبانو وياند ذبيح الله مجاهد د ترکيې له ټي.آر.ټي تلويزيون سره په مرکه کې ويلي، چې په افغانستان کې د جګړې کلونه تجربه لري او تر پېړيو هم جګړه مخته وړلای شي.
ښاغلي مجاهد ويلي، چې دوی يواځې د سولې اړوند خبرې له امريکا سره کوي ځکه په وينا يې چې د افغان جګړې اصلي لوری امريکا ده نه افغان حکومت.
تر دې مخکې، د ګډ حکومت چارواکو د کاپل پروسې په دوهمه ناسته کې طالبانو ته د سولې د خبرو وړانديز وکړ خو طالبانو تر اوسه د افغان حکومت دغې وړانديز ته ځواب نه دی ويلي خو په خپلو اعلاميو کې يې دغه ډول غونډې يواځې غولوونکې او د وخت ضايع کول یاد کړي دي.
