(کابل ټکی کام ۱۳۹۷ وری ۲۲)
د ولسي جرګې یو شمیر غړي وایي چې د کندوز د دشت ارچي ولسوالۍ د مدرسې د دستاربندۍ په جلسه د شوي بمبار څیړنې ښایي حکومت په خپله ګټه نشر کړي.
په ولسي جرګه کې د کابل د خلکو استازی الله ګل مجاهد وایي؛ داسې اسناد او شواهد یې موندلي چې ښیي د کندز د خلکو استازو د دفاع وزارت او د ملي امنیت له ریاست سره معامله کړې تر څو په نښه شویو ولسي خلکو ته د طالب وسلوالو نوم ورکړي چې د ده په وینا دا کار د کندز له خلکو سره لویه جفا ده.
په دې پیښه کې چې ګډحکومت یې پړه منلې تر سلو ډیر ولسي کسان ووژل شول او تر ۲۰۰ ډیر ټپیان شول چې غوڅ اکثریت وژل شوي او ټپیان ماشومان و.
افغان حکومت د دې برید په تړاو سخت وغندل شول او یاد برید په نړیواله کچه توند غبرګونونه له ځانه سره درلودل.
ټاکل شوې وه چې د کندوز د پیښې د څیړلو په خاطر ولسي جرګه هم سیمې ته خپل پلاوی واستوي خو وکیلان وایي، چې د جرګې رئیس عبدالرؤف ابراهیمي له حکومت سره د کندوز په مهمو پیښو او مسائلو معامله کوي او د یاد پلاوي د استول لا هم معلوم نه دي.
د کندوز استازی کمال ساپی وایي، په تیرو څو کلونو کې د کندوز پر ولسي خلکو په ځلونو د ګډوځواکونو له خوا تیری وشو خو هیڅ څیړندوی پلاوی پیدا نه شو چې عاملین یې معلوم او د قانون منګولو ته یې وسپاري.
الله ګل مجاهد وویل‹‹موږ او تاسې پرېکړه کړې چې کندز ته به له درې کمېسیونونو نه کسان لېږو، زه فکر کوم د کندز او یا د نورو ولایتونو وکیلانو معامله کړې، دولت د ځان په ګټه پرېکړه کوي، زما په باور د دفاع له وزیر او د ملي امنیت له رئیس سره معامله شوې ده.››
که څه هم حکومت د کندوز د پیښې په اړه خپل څیړنیز راپور تر اوسه نه دی نشر کړی او ښایي د راتلونکې شنبې پر ورځ نشر شي خو سر له اوسه اندیښنې شته چې حکومت به داپیښه لکه څنګه یې چې له لومړي سره په نښه شوي کسان یواځې وسلوال بلل، ښایي اوس هم په خپله ګټه ترېنه کار واخلي.
