(کابل ټکی کام، ۱۳۹۷، وری ۲۳) د بخښنې نړيوال سازمان وايي، په افغانستان کې د اعدامونو ترسره کول د دغې هېواد له امنيت سره مرسته نه کوي او بايد دغه لړۍ بنده شي.
د بخښنې نړيوال سازمان په خپل راپور کې ويلي، چې په ۲۰۱۷ م کال کې په افغانستان کې پنځه تنه په اعدام محکوم زندانيان په دې موخه په دار ځړول شوي چې په دغې هېواد کې د مخ پر زياتېدونکو بريدونو مخه ونيول شوي.
خو د نړيوال سازمان د اعدام د برخې سلاکارې کيارا سانجيورجيو هم تاييدوي چې په افغانستان کې اعدامونه د ترسره شويو بريدونو په غبرګون کې ترسره کېږي چې دا د دغې هېواد په ارامۍ کې هيڅ مرسته نه شي کولی.
هغه وايي، د اعدام سزا ورکول د افغانستان د امنيت لپاره ګټور نه دي او له ولسمشر غني يې غوښتي چې له دې وروسته دې د اعدام سزا نه عملي کوي.
د بخښنې سازمان وايي، د نړې په کچه تېر ۲۰۱۷م کال د وړم کال په پرتله اعدامونه کم شوي خو بيا هم چين، پاکستان او ايران د هغو پنځو هېوادونو له ډلې دي چې تر ټولو ډېر اعدامونو پکې ترسره شوي دي.
شاوخوا يوه نيمه مياشت مخکې يو شمير سرچينو خبر ورکړ، چې د ګډ حکومت چارواکو لسګونه سياسي زندانيان ځانګړي ځآی ته راټول کړي غواړي چې د اعدام سزا ورکړي.
خو طالبانو يې په اړه توند غبرګون وښود او ګواښ يې وکړ که چارواکي د زندانيانو اعدامول پيل کړي دوی به هم عدلي قضايي ارګانونه، قاضيان، څارنوالان د خپلو بريدونو په لومړیتوب کې راولي.
د يادونې ده، چې طالبان وخت ناوخت د خپل مشر (ملا هبة الله) د ځانګړو ورځو په فرمانونو کې د حکومت يو شمير نظامي کسان او دولتي منسوبين خوشې کوي خو تر دې دمه د حکومت له لوري دغه ډول اقدام نه دی ترسره شوی.
