په تېرو ولسمشریزو ټاکنو کې امریکايي مجلې «نیوزویک»اعلان وکړ، چې اشرف غني د نړۍ دویم مفکر دی. له دې مفکرۍ یې کمپاین کوونکو ښه گټه واخیسته او ډېر خلک یې ورمات کړل. ولسمشریزو ټاکنو ته بیا وخت نږدې شوی او اشرف غني هم ځینو ولایتونو ته سفرونه ډېر کړي.
هر ولایت ته له یوې نوې طرحې سره ځي او کټ مټ داسې خبرې کوي، لکه اوس چې بیا د ټاکنو وخت وي او غوړې ـ غوړې ژمنې ورکوي. کله افغانستان د هوا له لارې له واشنگټن سره نښلوي، کله ننگرهار ته له نوي ډیلي هوايي پُل راتېروي، کله د خوست جنغوزي جرمني ته استوي، د سلو کلونو برېښنا تولیدوي؛ خو هر څه یوازې خبرې او د عمل یې هېڅ څرک نه لگېږي.
د مفکر فېسبوکي ډلې یوه اوازه بیا خپره کړې، چې غني د امریکا د جان هانکنز پوهنتون د پوهانو ټولنې غړی شو، چې د نړۍ ۱۳ پوهانو په ډله کې یو اشرف غني هم راغلی. اشرف غني اوس مهال نه پوهنتون کې تدریس کوي، نو څنگه یې په پټو سترگو د پوهنتون د پوهانو غړی کړ.
پوهنتونونو کې خو هغه خلک د پوهاندۍ رتبې اخلي، چې عملاً پکې تدریس کوي؛ نو یو څوک څنگه خوشې په خوشې د پوهانو ټولنې غړی شي؟
دوی څلور کاله وړاندې هم ویل، چې اشرف غني د چین او روسیې اقتصاد پر پښو درولی او د چین او روسیې د پرمختگ ټولې طرحې اشرف غني جوړې کړي. خو په خپل هېواد او خپلو خلکو ته یې په تېرو څلورو کلونو کې هېڅ ونه کړل. زرگونه خلک له هېواده وتښتېدل، له نیمايي ډېر افغانان د شپې مهال په مړه گېډه ډوډۍ نه لري، ۷۱سلنه افغان ځوانان بې کاره گرځي، چې ډېری یې لېسانس او ځوان کدرونه دي.
پښتانه متل کوي«ازمایل شوي بیا نه ازمایل کېږي» اشرف غني څلور کاله واکمني وکړه؛ خو د حکومتولۍ ټولې پولې یې ونړولې. د امریکا په سفارت کې یې عبدالله عبدالله ومانه، څلور میاشتې یې له یو والي سره چنې ووهلې، ټول حکومت یې زورواکانو او غاصیبنو په لاس کې ورکړ، خپل ټول خواخوږي یې گوښه کړل او د شمال ټلوالې هره غوښتنه یې په پټو سترگو ومنله. له دومره نړیوالو ملاتړ سربېره یې بیا هم په هر څه سرې کرښې راکش کړې او هر زورواکي یې ته سر ټیټ کړ.
زه په پوره باور سره وایم، که په راتلونکو ولسمشریزو ټاکنو کې امریکا بیا لاسوهنه ونه کړي؛ نو اشرف غني به ۱۰ سلنه رایې هم یونه سي. ځکه پخواني کمپاین کوونکو یې اوس مهال تر ټولو سخت دښمنان دي او ټول یې خوابدي کړي دي، چې ټوله ورځ په رسنیو کې د اشرف غني ضد غږېږي.
اشرف غني د واک وږی و. داسې واکمنۍ ته یې غاړه کېښوده، چې په غاړه یې کې غټ د اجراییه ریاست توق ورترغاړې کړ، چې د اشرف غني هر فرمان یې وننگاوه او ټول حیثیت یې تر پښو لاندې کړ.
اشرف غني دې فکر نه کوي، چې دی به بیا واک ته ورسېږي. څومره چې ټاکنې رانږدې کېږي دی د سولې غږ ته هم کش ورکړي. خو د امریکا پر وړاندې سپوڼ هم نه شي کولی او ټوله سوله له طالبانو غواړي.
دا ملت د کندوز، فراه، ننگرهار، کابل، کندهار، پکتیا، خوست او د نورو ولایتونو بمباري نه هېروي. دا ملت یاد لري، چې داعش ستاسې او امریکا پر مټ د ننگرهار پر خلکو توره ورځ تراوسه شپه کړې ده، دا ملت نه هېروي، چې تا یوه ژمنه هم سرته نه ده رسولې؛ بلکې ټولې درنه په هوا کې پاتې دي.
دا ملت نه هېروي، چې اشرف غني د اسلام له لومړنیو اساساتو سره هم بلد نه دی، چې خلک دې په رڼا ورځ تهجدو ته رابلل، په جنازه کې دې لاسونه پورته کړل، حضرت حسین او حضرت حسن رضي الله عنهم دې د الله جل جلاله لمسي یاد کړل«العیاذ بالله»، د اقراء باسم ربک پر ځای دې اقراء باسم ربکم وویل، د بخاري کتاب دې له حدیثو وروسته دویم کتاب یاد کړ، خلکو ته دې کنځلې وکړې، ځان دې په خپله لېونی یاد کړ او حتی ځان ته دې د نه سړی زوی خطاب هم وکړ، د عطاء محمد نور لهخوا درته د یو سورت گواښ دې ټول ارگ غلی کړ.
اوس دې خلک له مسلمانۍ او پوهې ښه خبر دي. دا د ټاکنو د کمپاینونو شپې نه دي. که دا ځل د نړۍ هر څه وپېژندل شي؛ خو خلک یې یاد لري. دا خلک بیا نه غولېږي او نه به درته کمپاین وکړي.
