(کابل ټکی کام ۱۳۹۷ غویی۲)
د آسوشیتدپرس خبري اژانس خبر ورکړی چې امریکا افغانستان ته د شینوک هلیکوفترو او نورو چورلکو لپاره لسګونه پیلوټان رالیږي.
د خبر په حواله، امریکا د ۱۷۱ پیلوټانو له ډلې ۸۰ پیلوټان له «کالووا» ښار څخه د تکزاس آیالت ته استولي تر څو هلته خپله ۹ میاشتنۍ روزنه تر لاسه او بیا افغانستان ته ولیږدول شي.
دا په داسې حال کې ده چې څو ورځې وړاندې هم ۳۰ تنه نور امریکایي پیلوټان افغان جګړې ته د چمتوالي په خاطر د تکزاس د فورت هود پوځي اډې ته استول شوي و.
اوس مهال ټولټال ۲۸۰ تنه امریکایي پیلوټان د تکزاس په پوځي اډه کې تر روزنې لاندې دي تر څو افغان جګړې ته ښه چمتو شي.
باید وویل شي؛ چې امریکا افغانستان ته د لسګونو بلک هاک او نورو چورلکو او ځینو الوتکو د ورکړې ژمنه کړې چې اوسمهال یې په ډیره کمه اندازه پیلوټان تر روزنې لاندې دي.
دغو امریکایي ځواکونو ته د چورلکو او نظامي الوتکو سربیره په تدارکاتي برخه کې، د ځواکونو په تجهیز او په تعمیراتي برخه کې هم زدکړې ورکړل شوې.
آسوشیتدپرس همداراز ویلي؛ تر دې ور آخوا ۳۰ تنه امریکایي ځواکونه به یواځې د جګړو په لیکو کې د خپلو زخمیانو د ټولولو دنده پر غاړه لري.
د نوي امریکایي ولسمشر واک ته تر رسیدلو وروسته زرګونه امریکایي ځواکونو له مختلفو تجهیزاتو ،هوایی او ځمکنیو وسایطو سره افغان جګړې ته رادانګلي او لا هم دا لړۍ روانه ده.
شنونکي اټکل کوي چې امریکا په افغانستان کې د خطرناکې جګړې دپیل تکل لري او غواړي د پراخو هوایي بریدونو سربیره د جګړو لومړیو کرښو ته هم ځان ورسوي.
