(کابل ټکی کام، ۱۳۹۷، غویی ۴) د بادغيس ولايت په قادس ولسوالۍ وسله والو طالبانو د دولتي ځواکونو په پوستو بريدونه کړي او هغوی ته يې درنه مرګ ژوبله اړولې ده.
طالب وياند قاري يوسف احمدي کابل ټکی کام ته په رالېږلې خبرپاڼې کې ويلي، تېره شپه طالبانو له پريکنده جګړې وروسته د يادې ولسوالۍ په ګلچین سيمه کې له دولتي ځواکونو شپږ پوستې او يوه لويه قرارګاه نيولي دي.
د احمدي په خبره، په دې بريد کې دولس عسکر وژل شوي، ګڼ شمير ټپيان دي زياتوي چې د يو قومندان په ګډون ۲۹ عسکر طالبانو ته تسليم شوي دي.
خبرپاڼه کې راغلي، د جګړې په پايله کې “۲۷ میله کلاشینکوف، ۲ پيکاوې، ۴ عراده رینجر موټر، ۸ عرادې موټر سایکل او خورا ډیر مهمات د مجاهدینو لاسته ورغلي دي”.
نوموړی وايي، د جګړې پر مهال يو طالب وژل شوی او پنځه تنه نور ټپيان دي.
په عين حال کې د بادغيس د ولايتي شورا رئيس عبدالعزيز بیګ تاييدوي چې د شپږو پوستو له نيول کېدو وروسته د ګلچین ستراتيژيکه سيمه د طالبانو لاسته لوېدلې ده.
عزيزبیګ وايي، په دې بريدونو کې دوه عسکر وژل شوي او څلور تنه نور طالبانو له ځآن سره وړي دي.
خو ځايي اوسېدونکي وايي، چې طالبانو له ځان سره له لسو زيات پوليس د بنديانو په توګه ژوندي نيولي دي.
دولتي چارواکي په دې اړه له خبرو کولو ډډه کوي.
