(کابل ټکی کام، ۱۳۹۷، غویی ۶) تېره شپه د ننګرهار ولايت په شيرزادو ولسوالۍ کې ځانګړو ځواکونو عمليات کړي چې پر مهال يې د لسګونو کورونو سربيره شپږ تنه ملکي وګړي وژل شوي دي.
دغه عمليات د طوطو په سيمه کې د ملي امنيت د ځانګړې قطعې له لوري ترسره شوي دي.
د طوطو سيمې يو تن اوسېدونکي نعيم جان کابل ټکی کام ته وويل، د عملياتو پر مهال د الوتکو له لوري په ځينو سيمو بمونه وغورځول شول او د عسکرو له لوري له شلو زيات کورونه په بمونو ويجاړ کړل شول.
نوموړی زياتوي، د ځانګړو عسکرو د عملياتو پر مهال شپږ تنه وژل شوي چې يو د مسجد امام، دوه تنه د کنړ ولايت اوسېدونکي چې يادې سيمې ته د مزدورۍ لپاره ورغلي و، یو په سيمه کې خياطي کوله او دوه تنه نور کليوال چې عام وګړي دي وژل شوي.
ځايي اوسېدونکي وايي، چې عملياتي عسکرو دوه تنه عام کليوال د طالبانو په نوم له ځان سره وړي دي.
د ننګرهار د رسنيو دفتر له لوري په ياده سيمه کې دغه عمليات تاييدوي وايي، چې دغه عمليات د ملي امنيت د ځانګړې قطعې له لوري ترسره شوي چې پر مهال يې شپږ طالبان وژل شوي او دوه تنه نور تر شک لاندې نيول شوي دي.
دا لومړی ځل نه دی چې د دولتي ځواکونو په عملياتو د ملکي خلکو کورونه ويجاړيږي، نږدې دوه ورځې مخکې د لوګر برکي برک ولسوالۍ په شيخانو کلي کې ځانګړو ځواکونو عمليات وکړل چې د ځايي خلکو په وينا که څه هم دوی د طالبانو ملاتړ نه کوي خو عملياتي عسکرو کورونه وران کړل او د طالبانو په نوم يې ځينې کسان له ځان سره يوړل.
