(کابل ټکی کام، ۱۳۹۷، غبرګولی ۱۷) د افغانستان او بنګله دېش د ملي لوبډلو تر منځ نن د پنجشنبې په ماښام د درې يو ورځينو شل اوريزو لړۍ وروستۍ لوبه کېږي.
دغه پايلوبه چې د افغانستان پر وخت اووه بجې پيلېږي د يک تلويزيون له لارې په ژوندۍ بڼه ښودل کېږي.
د شل اوريزو لوبو د دغې لړۍ دوه مخکینۍ لوبې د هند په دهرادون ښار کې د افغانستان په کوربه توب ترسره شوې افغان لوبډلې په خپل نوم کړې.
د کرکټ بوډ مطبوعاتي مسئول فريد هوتک وايي، افغان لوبغاړي د روانې لړۍ پايلوبې لپاره پوره چمتووالی لري او تمه ده چې په ننۍ لوبه کې هم ښې لاسته راوړنې ولري.
ټاکل شوې ده، چې د افغانستان او هندوستان ملي لوبډلې د روانې مياشتې په څوارلسمه نېټه د لومړي ځل لپاره د پنځو ورځنيو ټيسټ لوبو لړۍ پيل کړي.
