(کابل ټکی کام، ۱۳۹۷، چنګاښ ۳۱)
د افغانستان لپاره د امريکايي مرستو د څار ادارې “سيګار” په خپل تازه راپور کې افغانستان د سوداګرو او پانګه والو لپاره دوهم ګواښوونکی او خراب هېواد بللی دی.
سيګار چې د افغانستان د ټولنيزې او اقتصادي ودې په اړه راپور خپور کړی وايي، په دغه هېواد کې د پانګه والو امنيت خوندي نه دی، د هغوی لپاره هيڅ ډول اسانتياوې شتون نه لري ځکه خو بهرني پانګوال په دغه هېواد کې پانګونې ته زړه نه ښه کوي.
راپور زياتوي، افغانستان کې د سوداګرۍ کچه په بې ساري توګه رالوېدلې، د سوداګرۍ برخه کې پرمختګ نه دی شوی او دغه هېواد کې لا هم سوداګري مخ پر ځوړ روانه ده.
د سيګار په راپور کې راغلي، د افغانستان اقتصادي حالت تر ټولو په بد وضعيت کې دی زياتوي چې هر کال زرګونه لوستي کسان د کار چاپيريال ته وړاندې کېږي خو سره له زده کړو بې کاره پاتې کېږي.
دغه راز څېړنو ښودلې چې افغانستان د سوداګرۍ په نړيوال ليست کې د تير کال په پرتله نږدې پنځوس سلنه شاتګ کړی زياتوي چې تېر ۲۰۱۷م کال کې افغانستان د سوداګرۍ په ليست کې دوه څلوېښتم خراب هېواد و خو په ۲۰۱۸م کال کې ۱۰۷ خراب هېواد ګڼل شوی دی.
راپور کاږي، د نړيوالو هېوادونو په اقتصادي ليست کې افغانستان د ۱۹۳ اقتصاد لرونکو هېوادونو څخه ۱۸۳ کمزوری اقتصاد لرونکی هېواد دی.
د ملي يووالي حکومت په راتګ او د غني په ولسمشرۍ خلکو نوموړی د نړۍ دوهم متفکر باله او هېوادوالو ورته ډيرې هيلې لرلې چې ښايي د هغه په هڅو افغانستان يو اقتصادي هېواد شي، خو وروستي راپورونه ښيي چې د ګډ حکومت اقتصادي تګلاره يا کړنې ناکامې او د هېواد په زيان تمامې شوي دي.
د ګډ حکومت د ناسمو سياستونو، فساد او ناسم مديريت له کبله په افغانستان کې بهرنيان پانګونې ته زړه نه ښه کوي او د افغان سوداګرو د پانګونې کچه تر پخوا څو چنده ټيټه شوې، بهرنی تجارت د پخوا په پرتله کم شوی، اقتصادي وده مخ پر ځوړ ده او د فقر او بې کارۍ له کبله هره مياشت سلګونه کسان خپل هېواد پرېږدي.
