کابل.کام – د وږي ۴مه، ۱۳۹۷:
امریکايي او افغان چارواکي وايي چې د افغانستان لپاره د داعش ډلې مشر د بې پیلوټه الوتکې په یوه برید کې وژل شوی دی.
د ننګرهار د والي وياند عطاءالله خوږياڼي ویلي، د داعش مشر تېره شپه د ننګرهار د خوږیاڼو ولسوالۍ په ځنګل سیمه کې له خپلو لسو ملګرو سره یو ځای د افغان او بهرنیو ځواکونو په ګډ هوايي بريد کې ووژل شو.
په افغانستان کې د مېشتو امریکايي ځواکونو یوه ویاند، مارټین اوډونیل، هم فاکس نیوز ته د افغان چارواکو له خولې ویلي چې افغانستان کې د داعش مشر وژل شوی دی.
افغان چارواکو رسنیو ته د داعش د دې وژل شوي مشر درې بېل نومونه یاد کړي: ابو سعید اورکزی، ابو سعد اورکزی او ابو سعد ارهابي.
داعش ډلې تر دې دمه په دې اړه څه نه دي ویلي.
امریکايي چارواکي پخپله باوري نه دي چې ګوندې د داعش دا مشر دې وژل شوی وي، او افغان چارواکي هم وخت ناوخت د وسله والو د مشرانو د مرګ په اړه غیریقیني څرګندونې کوي، چې وروسته دروغ ثابتې شوې دي.
حکومت ادعا کوي چې دا په افغانستان کې د داعش (اسلامي دولت) ډلې څلورم مشر دی چې وژل کېږي.
په افغانستان کې د داعش دا مشر داسې مهال وژل کېږي چې طالبانو تېره میاشت (د زمري په ۹مه / ۳۱ جولای)، په جوزجان ولایت کې د دې ډلې جنګیالیو ته په ماتې ورکولو سره د هېواد شمال له دې ډلې پاک کړ، او په ننګرهار ولایت کې یې هم د دې ډلې پر خلاف پراخ عملیات پیل کړي دي.
په جوزجان کې د داعش پر ضد عملیات د طالبانو ځانګړو قطعو پر مخ بېول. په دې عملیاتو کې، د طالبانو په خبره، ۹۲ داعش جنګیالي ووژل شول، ۵۱ ټپیان شول او ۱۲۸ نور طالبانو ژوندي ونیول. په دې ۲۴ ورځنیو عملیاتو کې ۱۷ طالبان ووژل شول او ۱۳ نور ټپیان شول.
خو د جګړې په وروستیو شېبو کې، افغان ځواکونو په جوزجان کې د داعش ډلې د عمومي مسؤل حبیب الرحمن رهبر، د هغه د مرستیال مفتي نعمت، او جوزجان کې د دې ډلې د ارتباطاتو د مسئول داملا صبغت الله په ګډون نږدې ۱۵۸ داعشیان او د هغوی کورنۍ له سیمې وایستل او وروسته یې په دولتي مېلمستونونو کې مېشت کړل.
په جوزجان کې د دې ډلې تر ماتولو وروسته، اوس طالبان هڅه کوي چې د هېواد ختیځ کې د داعش اصلي ځاله، ننګرهار ولایت، هم له دې ډلې پاک کړي، او په دې موخه یې په دې ولایت کې پراخ عملیات پیل کړي دي.
طالبان وايي، د دې عملیاتو پر مهال امریکایي الوتکې د داعش پر ضد د جنګېدونکو طالبانو پر لومړیو کرښو بمبار کوي.
د سیمې اوسېدونکي هم تاییدوي چې الوتکې په پرلپسې توګه له داعش سره پر جنګېدونکو طالبانو بمبار کوي.
یوه اوسېدونکي کابل.کام ته ویلي چې په تېره يوه اوونۍ کې بې پيلوټه الوتکو تر شل ځله زیات هوايي بریدونه کړي، چې له امله یې د طالبانو جنګیالیو ته زیان اوښتی او د داعش پر ضد یې د طالبانو د پرمختګ مخه په ټپه نیولې ده.
پر افغان حکومت او امریکايي ځواکونو په افغانستان کې د داعش د ملاتړ تورونه لګول کېږي، خو دوی تل دا تورونه رد کړي او وايي چې د دې او نورو نړیوالو او سیمه ییزو ”ترهګرو ډلو“ پر ضد خپلو عملیاتو ته دوام ورکوي.
