راپورتاژ: الماس خدرخېل—
د نړۍ په کليساګانو کې له تيرو ډيرو کلونو راهيسې د ماشومانو د جنسي زورونې لړۍ روانه ده چې وخت پر وخت پرې راپورونه ورکول شي خو د نړۍ د کاتولیکانو مذهبي مشر پاپ دویم فرانسيس په لومړي ځل اعتراف کوي چې په کليساګانو کې پر ماشومانو جنسي تيري شوي.
له تيرو شاوخوا لسو کلونو راهيسې وار وار په کليساګانو کې د ماشومانو د جنسي زورونې راپورونه ورکول شوي خو د ۲۰۱۲په جنوري کې په لومړي ځل يو الماني مذهبي مشر اندریاس ومنله چې د ۲۰۰۴کال راهيسې يې په درې ماشومانو چې عمرونه يې د نهه او پنځلس کلونو پورې و ۲۸۰ وارې جنسي تيری کړی دی.
نوموړي ويلي، دغه کار به يې ډيری وخت د رخصتيو پر وخت کاوه.
په دغه هېواد کې د کاتوليکي کليسا پر کشيشانو د دغه ناوړه عمل سلګونه دوسيې ثبت شوي او ډيری خلک دې ته اړ شوي چې کليساګانو ته له ورتلو لاس په سر شي.
دغه راز په ۲۰۱۳م کال کې د استراليا په ويکتوريا ايالت د کليساګانو يوه مشر “ملبورن دينيس هارټ” پر دې اعتراف وکړ چې د دغه ایالت د کليساګانو مشرانو په تر شپږ سوو ډيرو ماشومانو جنسي تېري کړي دي.
خو د ماشومانو د حقونو ځينې مدافعين او فعالين بیا وايي، شايد د هغو ماشومانو شمېر تر ۱۰ زرو واوړي، چې د کليساګانو مشرانو پرې جنسي تېري کړي دي.
کليسا پخپل يوه راپور کې ويلي چې پرماشومانو د جسني تېري د ۶۲۰ پېښو نېټه تېر ۸۰ کاله ښودل شوي، چې دقيقه نېټه يې د تېرې پېړۍ د شپېتمې او اتيايمې لسيزو ترمنځ ښودل شوې ده.
همدارنګه د روان کال د اګست په پنځلسمه نیټه د امريکا متحده ايالاتو په پنسلوانيا ايالت کې پلټونکو په کاتوليکي کليساګانو کې د ماشومانو څخه د پراخې ناوړه جنسي استفادې او تیريو د پټ ساتلو په اړه ټکان ورکوونکي جزيات ښکاره کړي دي.
د پنسلوانيا عمومي څارنوال جان شاپيرو په يوه تازه راپور کې ويلي، چې د دغه ايالت په تر درې سوو زياتو کاتوليکي کليساوو کې پادريانو “مذهبي مشرانو” په ماشومانو جنسي تيري کړي دي.
جان شاپيرو وايي: “په دغه جرم د ککړو کشيشانو ليست اوږد دی په وينا يې تر اوسه ټول نه دي پيژندل شوي” زیاتوي ښايي دا شميره تر دې لوړه وي ځکه چې ډيری ماشومانو کیدی شي له ډاره چاته څه نه وي ويلي او د زياتو نورو قضيې لا هم نه دي په ډاګه شوي.
راپور زياتوي، دا تيري له تيرو څو لسيزو راهيسې شوي او څېړنه يواځې د دغه ایالت د کليساګانو د نفوذ لاندې په شپږو حوزو کې ترسره شوې، د شاپيرو په وينا:”عيسوي کشیشانو پر کوچنيو نجونو او هلکانو جنسي تيري کړي خو مسوولينو هيڅ هم نه دي کړي، دا هر څه یې پټ ساتلي او کليساګانو هڅه کړې په هر ه بيه خپل تاسيسات وساتي”.
په څېړنو کې ښودل شوې چې دوه مذهبي مشرانو په تيرو لسو کلونو کې په هغو هلکانو او نجونو جنسي تيري کړي چې عمرونه يې لا بلوغ ته نه و رسېدلي، په يوه قضيه کې ويل شوي چې مذهبي مشر به هلکان د “سرطان” د يوې معاينې په پلمه د خپل هوس ښکار کول.
شاپيرو وايي، راپور د عیني شاهدانو او کليساګانو د يونيم ميليون اسنادو پر بنسټ چمتو شوی چې د کليساو چارواکو په خپلو ارشيفونو کې ساتلي وه.
نوموړی زياتوي، د کلیساګانو لوړپوړي استازي هم شامل دي چې ډيرو يې د خپلو نومونو د پټ ساتلو پر وړاندې کلک مقاومت وکړ او راپور تر ډيره ځنډول شوی و.
په کليساګانو کې له دومره تیريو وروسته د نړۍ د کاتولیکانو مذهبي مشر پاپ فرانسیس ايله اوس د کشیشانو له خوا پر ماشومانو په جنسيو تيریو اعتراف وکړ او په ايرلنډ کې يې د خبرو پر مهال وويل: چې د مذهبي مشرانو له خوا په يادو کړنو د شرم احساس کوي او پر دې تاسف کوي چې نورو مذهبي مشرانو هم پرې پردې اچولي.
هغه وايي، په ايرلنډ کې پر ماشومانو پر جنسيو تيریو يواځې دومره کولی شو چې پرې اعتراف وکړو او زیاته يې کړه ده تيري د هغه چا له خوا شوي چې د دوی د مذهبي مشران و او د هغوی د روزنې دنده يې په غاړه لرله.
په عين حال کې انډيپنډينټ ورځپاڼې ته د واتيکان يوه پخواني چارواکي ويلي چې پاپ فرانسيس دې ځکه استعفا ورکړي چې د پادريانو او نورو مذهبي مشرانو له خوا پر ماشومانو د جنسي ځورنې پېښې له پامه غورځولي دي.
يواځې دا نه پورتني راپورونه ورکول شوي او د کليساګانو ناوړه څېره بربنډوي بلکې د نړۍ په نورو برخو کې هم د کليسا واکمنان او پالونکو داسې کړنې کړي چې انسانيت يې د شرم احساس کوي او لا هم دغه لړۍ روانه ده.
مسلمانان په دې باور دي چې عیسويت تحريف شوی او نه يواځې دا چې د خلکو ستونزې حل کولای نه شي بلکې بشريت ته يې لا ډيرې ستونزې راولاړې کړي چې پورتنۍ يې څو بېلګې دي.
