ژباړه: ابن مبارک احمدزی
لیکوال: ابو طیب پنجشیري
پنجشیر د ګران هېواد په شمال کې واقع او له کابل سره ۱۲۰ کیلومتره واټن کې پروت دی.پنجشیر له شپږو ولایتونو سره ګډه پوله لري؛ لکه : کاپیسا، پروان، بغلان، تخار، بدخشان او نورستان. د پنجشیر شتل ولسوالۍ له پروان سره پوله لري. د سالنګ ستراتیژيکه لاره او د هندوکش د سلسلې لوی غر هم له همدغو داوړو ولایتونو څخه تېر شوې دی او د هېواد ختیز، مرکز او سویل یې له یو بل سره تړلي دي.مجاهدینو د شوروي د یرغل پر مهال همدا ځایونه د یرغلګرو روسانو او د هغوی د تالي څټو کمونستانو له پاره سره تبۍ ګرځولې وه او ډېره ګرانه وه چې روسان یا کمونستان دې له یادې سیمې په ارامه وتلي وای.اوس یرغلګر امریکایان او مزدوران یې هم په یادو دواړو ولایتونو کې د مجاهدینو له حضور او فعالیت څخه سخت په اندېښه کې دي.
د پنجشیر ولایت پریان ولسوالۍ د بدخشان له کران او منجان ولسوالۍ سره لاره لري، د اسلامي امارت د حاکمیت پر مهال همدا لاره د شر او فساد د لښکرو پر مخ خلاصه وه او له همدې لارې څخه یې اکمالات کېدل.الحمد لله اوس یاده سیمه په بشپړه توګه د اسلامي امارت شازلمو د دښمن د هر ډول تحرک پر مخ بنده کړې ده.د یادونې وړ ده چې پریان ولسوالۍ له نورستان ولایت سره هم لاره لري.
د لغمان ولایت د دولت شاه ولسوالۍ له لارې د پنجشیر له آبشار ولسوالۍ سره پوله لري. همدارنګه آبشار او درهء عبدالله ولسوالۍ ګانې له کاپیسا ولایت سره هم لاره لري.د الله تعالی په ځانګړي نصرت سره؛ د لغمان او کاپیسا ولایت مجاهدین د پنجشیر له هغو سره ښه سنجول شوې او ستراتيژیکه همغږي لري او ډېر ځله په خپلو منځونو کې نظامي مشورې کوي.تر خپل وسه پورې د یو او بل مرسته کوي.
د پنجشیر ولایت جغرافیايي موقعیت اوس مهال د اسلامي امارت مجاهدینو په ګټه دی، د اسلامي امارت فدایان او شازلمي پر ټولو هغو لارو بشپړ واک او تسلط لري چې پنجشیر ته ور رسېدونکي دي؛ په بل عبارت سره که ووایو نو پنجشیر د اسلامي امارت مجاهدیتو محاصره کړی دی.
په پنجشیر ولایت کې د الخندق عملیاتو بهیر:
په دغه ولایت کې د الخندق عملیاتو پلان د ولایت د جهادي مسؤول، د ولایت د مرستیال او د نظامي کمیسیون د مسؤول تر څارنې او نظارت لاندې طرحه او بشپړ شو.د یاد ولایت جهادي مسؤول له خپلو مجاهدینو سره اوږه په اوږه په عملیاتو کې برخه اخیستې ده.
مجاهدینو ته امر او لارښوونه وشوه چې لومړی باید د ولایت د مرکز اړوند پوستې تر برید لاندې ونیسي.مجاهدینو هم له هدایت سره سم؛ د درهء عبدالله ولسوالۍ له لارې د ولایت د مقام دفاعي پوستې تر برید لاندې ونیولې، په پایله کې د دښمن ۲ مهمې او لویې پوستې فتحه شوې، ۳ تنه عسکر د جګړو او نښتو پر مهال ووژل شول او ۵ تنه یې ټپیان شول. دغه راز۲ تنه پولیس مجاهدینو ژوندي اسیران کړل. همدارنګه مجاهدینو ۵ میله کلاشنکوفونه، یو میل پیکا ماشینداره او ډېر نور مهمات ولجه کړل.
له هغې وروسته؛ په پریان ولسوالۍ کې هم مجاهدینو تابیا ونیوله تر څو د یادې ولسوالۍ پر مرکز پراخ برید وکړي.کله چې د اسلامي امارت مجاهدین د نورستان ولایت د مندول ولسوالۍ له لارې د پنجشیر پریان ولسوالۍ ته را ورسېدل د خلکو له تاوده هرکلي سره مخامخ شول. خلکو به د اشغالګرو یا هم د هغوی له مزدورانو څخه له ډارېدو پرته وویل: موږ د اسلامي امارت د مجاهدینو د شجاعت او مېړانې په اړه اورېدلي وو؛ خو اوس مو دا دی د سر په سترګو ولیدل چې تاسو داسې یوه ځای ته راورسېدئ چې دښمن به یوه نه نیول کېدونکی او خپله مستحکمه کلا ګڼله.
پر ګران افغانستان باندې د اشغالګرو امریکایانو تر ناروا برید وروسته دا لومړی ځل دی چې مجاهدین عملاً د عملیاتو په موخه د پنجشیر ولایت پریان ولسوالۍ ته ور داخلېږي.دښمن که څه هم د پنجشیر په پولو کې د اسلامي امارت له نویو او تازه نظامی تحرکاتو څخه خبر ترلاسه کړی و خو په یادو سیمو کې د دښمن مېشتو منسوبینو او عسکرو و نه شو کولای د اسلامي امارت د مجاهدینو له پرمختګ څخه مخنیوی وکا.د کابل ادارې عسکرو مورال له لاسه ورکړ او وتښتېدل.
د اسلامي امارت مجاهدین د پریان ولسوالۍ ۳ کیلومترۍ ته رسېدلي وو چې د دښمن مرستې ته نوره پرېمانه نظامي او کومکي قوه راغله، نو مجاهدینو هم وپتیله چې د عملیاتو پلان بدل کړي، د نویو عملیاتو د اجرا په موخه آبشار ولسوالۍ ته ور دننه شول، او د یادې ولسوالۍ تر کلینیکه پورې یې پرمختګ وکړ.په یاده شوې ولسوالۍ کې هم له دښمن سره جګړه وشوه چې په ترڅ کې یې ۵ تنه عسکر ووژل شول او ۶ تنه هم ټپیان شول.په وژل شویو کې د یاد ولایت د چټک غبرګون د قطعې مشر قومندان رجب هم شامل و.
په آبشار او درهء عبدالله ولسوالیو کې د دښمن نقلیه وسایط هم تخریب شول.الحمد لله چې دښمن هر څومره کوښښ وکړ بیا یې هم د پنجشیر ولایت مهمو او ستراتيژیکو سیمو ته د مجاهدینو د ورتګ او داخلېدو مخه و نه شوه نیولی. د اسلامي امارت مجاهدینو د یاد ولایت په ۳ ولسوالیو کې په ډاډه زړه عملیات ترسره کړل. او لا هم په لوړ همت او کلک عزم سره خپلو جهادي عملیاتو ته دوام ورکوي.له دښمن څخه اوس لاره ورکه ده او اعتراف کوي چې طالبانو د پنجشیر ولایت له پاره جوړ شوی نه ماتېدونکی حصار اوس مات کړی دی.د یادولو ده چې د دغه ولایت له بېلابېلو ولسوالیو او سیمو څخه ډلې ډلې با احساسه ځوانان له اسلامي امارت سره یوځای کېږي.د مجاهدینو په شمېر کې د هرې ورځې په تېرېدو سره ډېروالی راځي. په پنجشیر کې د نورو بریاوو په هیله.
پای.
