(کابل ټکی کام ۱۳۹۷ وږی ۱۲)
د کابل په پل سرخ سیمه کې د ولسي جرګې یوې وکیلې یو دکاندار تر مرګه وهلی او مالی زیانونه یې هم ور اړولي.
د پل سرخ سیمې یو شیریني پلورونکی وایي، تیره ورځ ورته د غزني استازې “هما سلطاني“ له څو تنو سره یوځای دکان ته ورغلې او نوموړي ته یې سپکې سپورې ویلې.
دکاندار وایي “ وکیلې ته مې وویل ستا کسان بیخي زیات دي او دکان ته مشتریان زیات راځي، لطفاً دوی له دوکانه بهر ودروه؛ هغه پر دې خبره غوسه شوه او د خپلو کسانو په مټ یې ووهلم“
نوموړی زیاتوي، وکیلې یې تر وهلو وروسته د دکان ټولې ښیښې او څوکۍ ماتې کړې او یوې ښځینه مشتري ته یې هم سپکې سپورې ویلې.
د کاندار زیاتوي، له همدې امله یې نږدې حوزې ته شکایت کړی خو هغوی ورته نا امیده کونکی ځواب ورکړی “ د حوزې مسؤلینو راته وویل، دا وکیلان دي، قضایي مصؤنیت لري، نه شو کولی ستاسو قضیه وڅیړو“
دا لومړی ځل نه دی چې د پارلمان یو وکیل په لوی لاس د ولسي خلکو په ځورونه لاس پورې کوی، تر دې وړاندې ګڼو وکیلانو امنیتي ځواکونو، ترافیکو او ولسي وګړو ته د وهلو، ډبولو او سپکو سپورو په ویلو دریغ نه دی کړی او نه هم ورسره کوم قانوني چلند شوی دی.
