سرلیکنه
په افغانستان کې يوازې امريکايان نه بلکې د وخت هر يو تاړاکګر ازمايل شوی دى. د پرنګ له جنرال برنسه واخله د روسیې تر ګرموف او امريکايي نيکولسن پورې، هر يو په افغانستان کې د خپل دايمې شتون ژمنې له خپل ولس سره کړې دي، او د خپلو ژمنو د پوره کېدا لپاره یې پر افغان ولس د خپلو فابريکو هر ډول وسلې په لومړي وار ازمويلې دي. خو، له ټولو ازمويښتونو او له غروره ډکو ويناوو سره سره، ټولې هيلې یې افغان مېړني ولس ورخاورې کړې دي.. او ورخاورې کوي به یې.
امريکايي جنرال نيکولسن تر برتانوي جنرال، برنس، هوښيار او تجربه کار نه و. جنرال برنس خپلې ژمنې له ځان سره په تابوت کې يووړې، ګروموف هم پر مټ ټومبلي نښانونه له ځان سره د ژمنو په تابوت کې يووړل، لوڅې پښې او لوڅې مټې له افغانستانه ووت. جنرال برنس او جنرال ګروموف له خپلو خپلو ولسونو سره کړې ژمنې او پر افغان ولس د دوی ظلم چپه مېچنې د افغانستان په تاريخ کې ثبت دي.
تر جنرال نيکولسن دمخه، په افغانستان کې د امريکايي او بهرنيو پوځونو قوماندان، جنرال کمپبل، ته د پنټاګون لخوا دنده سپارل شوې وه چې د يو کال په موده کې به له افغانستانه د طالب نوم ورکوي او بايد نور د افغانستان په يوه ښار او يوه سيمه کې جګړه ونه واوسي. خو جنرال کمپبل تر ١٨ مياشتو دندې وروسته، په خپله ناکامۍ اعتراف وکړ.
که څه هم کمپبل له پنټاګون سره د هر څه پخلی کړی و چې افغانستان کې به ورکړل شوې نقشه پلې کړي، خو له ټټر وهلو سره سره یې، له پنټاګون سره کړې ژمنې له ځان سره يوړې.
په کومه ورځ چې (د ١٣٩٤ کال د حوت د مياشتې ١٣مه) کمپبل خپله دنده جنرال نيکولسن ته پرېښوده او له افغانستانه ووت، په همغه ورځ پنځه سختې چاودنې وشوې. جنرال کمپبل د خپلې تجربې له مخې نيکولسن ته دا جمله تکرار کړه: افغانستان له سختو شرايطو تېرېږي، او ډېره ګرانه ده چې دا سخت شرايط مهار کړل شي.
همغسې وشول. د نيکولسن د ژمنو پر تابوت وروستی وړمه ورځ د هغه د دندې د پای ته رسېدا (ناکامه مامويت) پر مهال ووهل شو.
جنرال نيکولسن پخپله پر دې پوهېده چې کمپبل ترې په نظامي برخه کې څو چنده پوهه درلوده او له افغانستانه په ناکامۍ سره وځي، خو د پنټاګون لخوا ورسپارل شوې دنده وه، غاړه یې ورته کېښوده.
مړ شوي سناتور، جان مک کين، په یوه استجوابيه غونډه کې له نيکولسن څخه وپوښتل: په افغانستان کې روانه جګړه ګټل کېدونکې او که بايللې ده؟ نيکولسن ځواب ورکړ: ګرانه ده چې بايللې جګړه دې وګټل شي، ځکه په اوس وخت کې امريکا په افغانستان کې له ډېر سخت ازمويښت او بنبست سره مخ ده.
په کوم حالت کې چې جنرال نيکولسن دنده پیل کړې وه په همغه حالت کې یې پرېښوده.. او له افغانستانه د ژمنو ډک تابوت یې له ځان سره يووړ.
