د ماشومانو ژغورنې نړیوالې ټولنې په یمن کې د جګړې پر ټولو اړخونو تور پورې کړی چې د دغه هېواد خلک یې د لوږې له خطر سره مخ کړي دي.
Save the Children ټولنې له ملګرو ملتونو غوښتي چې له مسؤلو خواو سره د هغو بریدونو په اړه حساب وکړي چې د یمن د خلکو ژوند یې له ګواښ سره مخ کړی دی.
دې حقوقي ټولنې په یوه تازه بیان کې ویلي چې د سعودي – امارتي اېتلاف په شمول په جنګ کې ښکېلې ټولې خواوې د عامو خلکو د هغې سختې لوږې د خطر مسؤل دي چې یمنیانو ته په ستر ګواښ بدل شوی دی.
ټولنې غوښتنه کړې چې له هغو مسؤلینو سره دې سخت حساب وشي چې یمني کوچنیانو ته یې د درملو او خوړو د لېږد مخه نیولې، چې له امله یې د جګړو په سیمو کې نږدې نیم ملیون ماشومان د سختې لوږې له لاسه په روان کال کې مړه شوي.
دا ټولنه زیاتوي، له شرمه ډک عمل دا دی چې څوک د ملکي بېګناه خلکو له لوږې د خپلو جګړو لپاره د وسیلې په توګه کار اخلي.
تر دې دمخه، د یونیسیف مؤسسې ویلي و چې یمن په نړۍ کې د ژوند په تر ټولو بد حالت کې قرار لري، او د لوږې ریښې ورځ تر بلې پراخېږي.
ملګرو ملتونو په تیره مئ میاشت کې ویلي و چې یمن په ټوله نړۍ کې له تر ټولو بد بشري ناورین سره مخ دی.
د ملګرو ملتونو د بشري امورو عمومي مشر معاون، مارک لوکوک، ویلي، په یمن کې بشري ضد کړنې تر پولو اوښتې، او نږدې 22 ملیونه انسانان مرستې ته اړتیا لري.
لوکوک زیاته کړې، نږدې 8.5 ملیونه انسانان د لوږې له سخت خطر لاس او ګرېوان دي.
د ملګرو ملتونو د بشری حقوقو مشرې، میشیل باچلی، له سعودي – اماراتي اېتلافه غوښتنه کړې چې په یمن کې د جګړو قوانین شفاف کړي او هغو مسؤلینو ته سزا ورکړي چې په خپلو بریدونو سره یې د ملکي خلکو ژوند له خطر او کړاوونو سره مخ کړی دی.
د اګست میاشتې په پای کې، د بشري حقوقو یادې مشرې په یمن کې د هغو جنګي جرایمو په اړه رسمي اعلامیه خپره کړې چې سعودی – امارتي او د یمن حکومتي او د حوثیانو ډله یې په صنعاء او یو شمېر نورو ولایتونو کې مرتکب شوي دي.
د بشری حقوقو په اعلامیه کې ویل شوي و چې د اېتلاف په زیاترو بریدونو کې ملکي خلک وژل شوي، چې د ملکي وژل شویو خلکو شمېر له 2015 کال راهیسې 6660 کسانو ته رسیږي.
د ملګرو ملتو راپورونو یادونه کړې وه چې اماراتي نظامي ضابطانو زیات شمېر خلک اختطاف کړي، او په یمن کې یې په زندانونو کې ساتي، چې په مختلفو طریقو سره یې ورسره له جنسي تشدده کار اخیستی دی.
ـــــــــــ
سرچینه: الجزیره
ژ: عزیر اسدخېل
