(کابل ټکی کام، ۱۳۹۷، تله ۷)
د سولې عالي شورا مشر کريم خليلي وايي، نه له طالبانو سره د حکومت خبرې شوي او نه يې د سولې عالي شورا لیده کاته شوي.
تر دې مخکې د رويټرز خبري اژانس راپور ورکړی و چې طالبانو او حکومتي پلاوي په سعودي عربستان کې سره کتلي او په ليدنه کې د ټاکنو او د طالب بنديانو د تبادلې په اړه سره خبرې شوي دي.
خو د سولې شورا رئیس کريم خليلي وايي، تر دې دمه طالبانو سره نه د حکومت او نه هم د سولې شورا مخامخ خبرې شوي زياتوي ورته ډول راپورونه يواځې اوازې دي چې هيڅ يې مخه نه شي نیولای.
رويټرز خبري اژانس د روانې مياشتې په لومړيو کې هم ورته ډول راپور ورکړی و چې ځينې طالب چارواکو او حکومتي استازو د بنديانو د خلاصيدو په اړه ليده کاته کړي.
طالبانو هم د رويټرز اژانس راپور درواغ بللی او په يوه خبرپاڼه کې يې لیکلي :” موږ دا ډول افواهات په کلکه ردوو، په سعودي عربستان کې له هیڅ کوم جهت سره خبرې او ملاقات نه دی شوی”.
طالبانو يو ځل بيا ټينګار کړی چې د خپل رسمي دريځ د څرګندولو لپاره وياندويان لري چې د هغوی له لوري له رسنيو سره جريانات شريکوي.
طالبانو ويلي، چې رسنۍ د ورته ډول راپورونو په خپرولو سره خپل حیثيت زيانمنوي او بايد ژورنالستيکو اصولو ته پابند وواوسي.
