(کابل ټکی کام ۱۳۹۷ تله ۲۴)
له میدان وردګو څخه ورکړل شوي راپورونه وایي چې امریکایي ځواکونو د خپلو افغان ملګرو په ملتیا د دې ولایت د چک ولسوالۍ د “سیبکي“ پر بازار برید کړی او خلکو ته یې بې دریغه مالي او ځاني زیانونه اړولي دي.
خبر زیاتوي، ګډوځواکونو لومړی د خلکو دکانونه چور کړي او وروسته یې د درنو وسلو او لویو ماشینونو په مټ شاوخوا درۍ سوه (۳۰۰) دکانونه نړولي دي.
د دې ترڅنګ سیمیزې سرچینې وایي، افغان او امریکایي عسکرو په دې عملیاتو کې ، ۱ کور، ۳ شخصي موټر هم تخریب کړي دي.
سرچینه زیاتوي،دغه راز یې په مخامخ ډزو پنځه (۵) ملکي کسان شهیدان کړي او ۳ نور ژوبل دي.
ځایي خلک وایي، افغان او امریکایي عسکرو د خلکو باغونه هم پرې کړي او ګڼ شمیر ونې او فصلونه یې له منځه وړي دي.
طالبانو پیښه ستر بشري جنایت بللی، خو افغان او امریکایي چارواکو د تیر په څیر بیا هم د بریدونو په تړاو مرموزه چوپتیا ښوودلې.
باید وویل شي، چې د ملي دفاع وزارت وزیر طارق شاه بهرامي نن په یوه ناسته کې وروستۍ بمبارۍ ستره لاسته راوړنه او نوی تکتیک وباله چې په وینا یې، په دې توګه یې د طالبانو جګړیزه تګلاره کمزورې کړې.
د وروستیو شمیرو له مخې په تیره څه باندې یوه میاشت کې نږدې ۳۰۰ تنه ښځې او ماشومان په شپنیو چاپو او عملیاتو کې وژل شوي او سلګونه نور ټپیان دي.
