(کابل ټکی کام ۱۳۹۷ مرغومی ۸)
په داسې حال کې چې امریکا ،پاکستان او آن د سعودي عربستان چارواکو افغان حکومت ته بیاځلي ډاډ ورکړی چې طالبان به داځل ورسره مخامخ خبرو ته کینوي؛ خو طالبانو یوځل بیا دا احتمال ردکړ.
طالبانو هغه اوازې رد کړې چې ګواکې راتلونکې اونۍ به یې مرکچي پلاوی په سعودي عربستان کې له افغان حکومت سره مخامخ لیده کاته وکړي.
طالب ویاند ذبیح الله مجاهد ویلي،
“دغه آوازې حقیقت نه لري، له کابل ادارې سره د ناستې په اړه د اسلامي امارت په دريځ کې کوم تغیر نه دی راغلی بلکې پخوانی دريځ دی“
نوموړي دغه راز څرګنده کړې چې مذاکراتي پلاوی یې د سنجول شوي قوي پلان له مخې له امریکایي استازو سره د مذاکراتو بهیر پر مخ وړي چې د ده په وینا“ تر څو د افغانستان اشغال پای ته ورسیږي. “
نوموړي د امریکایانو له خوا د افغان حکومت چارواکو ته د هغه ډاډ په تړاو چې ګواکې طالبان به ورسره مخامخ خبرو ته اړ کړي ویلي چې د مذاکراتو له پروسې سره دې سطحي چلند نه کوي او نه دې هم چاته بې ځایه هیلې ورکوي .
مجاهد دغه راز په مقابل لوري ژغ کړی چې؛
“امریکایې جهت چې له اسلامي امارت سره د خبرو پروسې ته داخل شوی باید په ډيره سنجیدګۍ سره پرمخ لاړ شي او د تبلیغاتي استفادو هڅه و نشي. “
دا په داسې حال کې ده چې افغان حکومت هیله ښوودلې چې د بهرنیانو په وساطت به یې داځل د سولې د مشورتي بورډ غړي په جده کې له طالبانو سره د خبرو اجازه ترلاسه کړي.
سربیره پر دې چې خلیلزاد او پاکستاني چارواکو په تیر کې افغان حکومت ته ژمنه ورکړې وه چې طالبان به ورسره خبرو ته کینوي؛ خو د ابوظبۍ په ناسته کې د ارګ پلاوي ته په دهلیزونو کې هرکلی وویل شو او طالبانو ورسره ونه کتل.
طالبان وایي، چې روانه جګړه دوه بعدونه لري چې خارجي او داخلي دي؛ لومړی باید له بهرنیانو سره د نیواک مسئله وڅیړل شي بیا افغانان په خپل منځ کې سره جوړیدلی شي.
