(کابل ټکی کام، ۱۳۹۷، مرغومی ۸)
د افغانستان د متشبثينو عالي بورډ وايي، د فراه ګمرک بندېدو له کبله سوداګرو ته مالي زيانونه اوښتي دي.
د دغه بورډ مشر رحم الدين حاجي اغا وايي، له تيرو شپږو ورځو راهيسې د فراه د ۷۸ميله ګمرکي بندر تړل شوی چې دولت او سوداګرو ته يې سلګونه زره افغانۍ زيان اړولی دی.
نوموړی زياتوي، په دغه بندر کې له درې زره څخه زيات کسان د سمنټو او ساختماني چارو پر کارونو بوخت دي چې په تړل کېدو سره يې هغوی ته هم ګڼ مالي زيانونه اوښتي دي.
د متشبثينو د عالي بورډ مشر حاجي اغا غوښتنه وکړه چې له ایران سره دې دغه بندر ژر تر ژره پرانيستل شي څو سوداګر نو زيانمن نه شي.
