فاریاب: د واورې او بارانونو له کبله خلکو ته ګڼ مالي زیانونه اوښتي
(کابل ټکی کام ۱۳۹۷ سلواغه ۱۹)
د فاریاب ولایت ځایي چارواکي وایي چې د سختو واورو او بارانونو له امله په خانچارباغ او قرمقول ولسوالیو کې تر ۱۵۰ ډیر کورونه او ودانۍ نړیدلې دي.
د دغه ولایت د ولایتي شورا غړي وایي، د دغو اورښتونو په پایله کې د خلکو ۴۰۰ بوده مواشي هم وژل شوي او خلک له سختو ستونزو سره مخ شوي دي.
د سیمې اوسیدونکو دغه راز رسنیو ته ویلي، تیره شپه د قرمقول ولسوالۍ په اړوند سیمو کې د سیلابونو له امله ۷۰ کورونه له منځه تللي او خلکو ته یې نور بیساري زیانونه هم اړولي دي.
د فاریاب له طبي پیښو سره د مبارزې رئیس
عبدالوهاب اکبري وایي، سیمې ته یې لومړنۍ مرستې رسولې او د ویش لړۍ یې پیل کړې خو د سیمې خلک دا ادعا نه مني او زیاتوي، تر اوسه مرستې نه دي ورته رسیدلې او هیڅ کومې ادارې ورسره کومک نه دی کړی.
