غور چارواکي: یوه پوليس د خپلې پوستې اووه ميله وسلې پټې کړي او تښتيدلی
(کابل ټکی کام، ۱۳۹۸، غبرګولی ۷)
د غور د والي وياند عبدالحی خطيبي وايي په دغه ولايت کې يوه پوليس د پوليسو اووه ميله وسلې پټې کړي او خپله تښتيدلی دی.
د خطيبي په وينا، دغه عسکر د انتخاباتو کمېسيون د دفتر د پوستې ساتونکی و چې تيره شپه يې د خپلې پهرې پر مهال چې نور پوليس ملګري يې اوده شوي نوموړي پوليس اووه ميله وسلې غلا کړي دي.
هغه وايي، یاده سيمه د مرکز فيروزکوه ښار په جنوب کې قرار لري او ټوله د امنيتي ځواکونو تر حاکميت لاندې ده خو بیا هم اووه ميله وسلې غلا شوي دي.
نوموړی وايي، د تښتيدلي پوليس او وسلو لټون روان دی.
دا لومړی ځل نه دی چې يو پولیس د خپلې پوستې وسلې له ځان سره وړي بلکې ورته ډول ډيرې پيښې شوي دي، ډير کله داسې پيښږي چې جنګي کرښو ته څيرمه د پوستو پوليس د شپې له خوا لږې ډزې وکړي چې ګواکې جګړه پيښه شوې خو وروسته بيا مرمۍ په تجارانو او نورو وسله والو پلوري.
