کابل ټکی کام( شنبه، ۲۵ غبرګولي، ۱۳۹۸)
ډونالډ ټرمپ سپینې ماڼۍ ته لا نه وو ننوتلی چې په خپلو ویناوو کې به یې د ایران په ضد سختې خبرې کولې او د نړیوال تروریزم په ملاتړ به یې تورناوه.
څنګه چې په امریکایي رسنیو کې د ډونالډ ټرمپ له نوم وړاندې ولسمشر ولیکل شو او نوموړی سپینې مانۍ ته ننوت، د ایران په وړاندې یې د عملي اقدام تکل وکړ.
ډونالډ ټرمپ لومړی امریکا له هغه اتومي تړونه وایسته چې د نړۍ د پیاوړو هیوادونو او تهران ترمنځ لاسلیک شوی وو.
له تړونه د امریکا تر وتلو وروسته ټرمپ په ایران د بندیزونو خبره راپورته کړه او ایران یې له ځینو اقتصادي بندیزونو سره مخ کړ.
ډونالډ ټرمپ د ایران د تیلو په صادرولو هم بندیز ولګاوه او ویې ویل چې چین، ترکیه، جاپان، جنوبي کوریا او هند له دې وروسته نشي کولای، له ایرانه تیل واخلي.
که څه هم ایراني مشرانو د امریکا د دې اقدام په وړاندې سخت غبرګونونه وښودل او ویې ویل چې دا د امریکا د ماتې په معنا ده خو زیاته یې کړه چې دوی ته نورې هم ډیرې دروازې خلاصي دي او خپلو تیلو ته هر ډول بازار پیدا کولای شي.
د ایران په وړاندې د امریکا ارادې سمې نه بریښیدې، دا ځل نو د ایران مشران یو بل ټکان ورکوونکی خبر اوري، امریکا د ایران انقلابي ځواک سپاه پاسداران په تور لیست کې شامل کړ.
ټرمپ او د امریکا د بهرنیو چارو وزیر مایک پمپیو وویل چې سپا پاسداران په سیمه او نړۍ کې د ترهګرو ملاتړ کوي او په دې ډول موږ دا د یوې ترهګرې ډلې په صفت پیژنو او په تور لیست کې یې شاملو
په ایران د امریکا دغه اقدام سخت دروند تمام شو او خپله د سپاه پاسداران مشرتابه د امریکا دا عمل غیر مسؤلانه وباله او زیاته یې کړه د امریکا هر ډول تیري ته به سخت ځواب ورکړو.
په دې وخت کې نو د امریکا او ایران د اړیکو د سخت خرابوالي اټکلونه کیدل او د ناوړه عواقبو په اړه یې خبرې کیدې.
امریکا ورځ تر بلې ایران ته سخت ګواښونه کول او ویل به یې چې د امریکا او متحدینو په خلاف د ایران لخوا اقدام به د ایران د ورکې په مانا وي.
ایران به یې یو په دوه ځوابونه کول او د خپلې وړتیا او ځواک خبرې به یې کولې.
د ایران د بهرنیو چارو وزیر جواد ظریف څو ځله په مرکو او ټویټونو کې وویل چې ټرمپ د ایران سره د جګړې لیوالتیا نه لري خو د اسرائیلو صدر اعظم، د ملي امنیت سلاکار جان بولټن او د سعودي ولیعهد محمد بن سلمان یې جګړې کولو ته هڅوي.
د ایران او امریکا تر منځ د کړکیچ د ختمیدو په پار د دوی دواړو ترمنځ د خبرو اترو خبر راپورته شو خو ایران ویل چې امریکا دې یو ځل له ایرانیانو بښنه وغواړي او خپله رویه دې بدله کړي، بیا به خبرې کوو.
د ایران او امریکا له کړکیچ وروسته په دوبۍ او عمان کې د تیلو کانټینر او کښتۍ تر برید لاندې راغلې چې امریکا د دې بریدونو پړه په ایران وراچولې ده.
امریکا د یوه برید په اړه هم کره شواهد او اسناد لا نه دي وړاندې کړي چې ګواکي دا بریدونه رښتیا هم ایران کړي، ایران د امریکا دا تورنه ردوي او بې اساسه یې بولي.
د ملګرو ملتونو سرمنشي هم د دې بریدونو د صیي څیړلو غوښتنه کړې ده.
په ملګرو ملتونو کې د کویت استازي ویلي چې له امریکا باید پوښتنه وشي او په وینا یې چې د خپلو تورنو ثابتول به ورته یو ګران کار تمام شي.
د امریکا او ایران په کړکیچ کې کویت او قطر تر ډیره بریده د ایران تر څنګ ولاړ دي خو سعودي او عرب اماراتو بیا د امریکا لمن نیولې او د ایران په خلاف دسیسې جوړوي.
قطر له عرب هیوادونو غواړي چې ایران ګاونډی هیواد دی او باید د ګاونډي چلند ورسره وشي، نه دا چې موږ هم د غرب په پله قدم کیږدو.
په هرموز تنګي کې د سختو او ترینګلو حالاتو خبرداری ورکړل شوی دی.
