(لنډه کیسه )
امرالله عمران
خبریال د خپلي روزنامچي پاڼي واړولې څو سرسري یا داښتونه یې ولوستل، موضوعات ورته سولیدلې وبریښیدل، کتابچه یې بنده کړه، د کمپیوټر سکرین ته مخامخ شو، څوبیلابیلې ویب پانې یې خلاصي کړي فیسبوک پاڼه یې تازه کړه، لومړی یې مسجونو ته پام شو، انټرنیټ مصرفه شو، وخت یې ونیوه له میز یې پیاله ورپورته کړه، چاې ګرم وو وړوکې غړپ یې ترې وکه، په چوکۍ کې یې شاته ډډه ووهله چې په دې وخت کې د کمپیوټر په سکرین پرله پسی مسج پاڼې خلاصي شوي، خبریال زیرشو! د فیسبوک ملګري یو کلیوال یې ورته لیکلی وو؛ د خدای لپاره دا زموږ پوسټونه او لیکني ولي خلک نه ګوري!؟ دا عکسونه او ویډیو ته وګوره! بیګا شپه چاپمارو ځواکونو زموږ د کلی مدرسه او مسجد بمبار کړی، تاسي ویډیو وګورئ په مدرسه کې یې واړه ماشومان له خاورو لاندې کړي!
خبریال ویډیو پلی کړه، چې ګوري رښتیا هم ددوي د کلی دمدرسی د چهاردیوالې نه غیر نور ټول تعمیر د ځمکې سره برابر وي .
کلیوال لږیا وي له خاورو د ماشومانو جسدونه راباسي، یو خواته سپین ږیری بابا ښکارې د قران کریم نیمه سوزیدلې پاڼې یوې خواته کیږدي او په ساه نیولي غږ یې له خوالې همدا خبره راوځې چې ته یې همداسی وسوځوې لکه څنګه یې چې د قران پاڼې سوځولي.
هرې خواته چې کمره تاویدله یو بوږ نونکې حالات وه، د خلکو خبري د زغمه وتلي وي .
خبریال یودم ورخطا شو زریې مبایل ته لاس کړ د خپل پلار نمبر یې راواړو زنګ یې وروهه … لږه شیبه ورسته اوکې شو، خبریال ترې د بمبار پوښتنه وکړه؟ … د هغی خوانه ستومانه غږ راغی : هو بچیه! زموږ د کلي ټوله مدرسه یې بمبار کړي موږ همدا اوس په هدیره کي قبرونه کیندو ….
نور نو خبریال ته سوژه پیدا شوی وه، غوښتل یې چې رپوټ پرې جوړ کړې، کلی یې ډیر لرې هم نه و.
لومړی یې د والې ویاند سره خبري وکړي، هغه دپیښې ناخبري وښوده! بیا یې ولسوال سره خبري وکړي هغه د تروریستانو دوژلو خبره کوله ….
خبریال نور سم له لاسه د چوکۍ پورته شوه لږه شیبه ورسته یې د نشراتو مدیر لاسنیولې کمپیوټر مخي ته ودراوه، ویډیو یې ور وښوده، د رپوټ جوړولو غوښتنه یې وکړه !
د رسنۍ مسؤل ورته کړه: ګوره دا سوژه زموږ د پالیسي سره برابره نه ده ، ته دا پریږده راځه چې همدا اوس اِمِیل راغلی په ولایت کې د بشري حقونو د خونديتوب غونډه ده ، وسایل دې له ځان سره واخله عاجل پری ګوزارش برابر کړه .
پاې
۱۳۹۸ـ۴ـ۲۵ ـ جلال کوټ
