کابل ټکی کام( پنجشنبه، ۱۰زمری، ۱۳۹۸)
بادغیس کې د واده پر مراسمو هوایي برید خونړی مرګ ژوبله رامنځته کړې ده.
پیښه د بادغیس ولایت په جوند ولسوالۍ کې داسې مهال رامنځته شوې چې خلک د واده د خوشالۍ پر مراسمو بوخت وو.
د بادغیس والي هم برید تائید کړی خو د مرګ ژوبلې په اړه پټه خوله پاتې شوی دی.
د مرګ ژوبلې کره شمیره لا هم ځکه نه ده څرګنده شوې چې برید ډیر خونړی ښودل شوی او ویل کیږي چې ډیر خلک تر خاورو لاندې دي.
د سیمې د خلکو په وینا چې تر اوسه د ۱۳ مړو جسدونه لاس ته ورغلي او په وینا یې چې ښایي د مړو شمیر نور هم جګ شي.
که څه هم دا نه ده معلومه چې یاد هوایي برید بهرنیو که افغان ځواکونو ترسره کړی خو دا ډول بریدونه ډیری وخت د دواړو لورو لخوا په ګډه همکارۍ ترسره کړي.
د یادونې وړ ده چې دوه ورځې وړاندې هم په پروان کې ګډو ځواکونو د شپنیو عملیاتو په ترڅ کې ۲۵ تنه بې ګناه افغانان ووژل.
دا بریدونه په داسې حال کې ترسره کیږي چې تازه د یوناما لخوا د ملکي تلفاتو په اړه خپاره شوي راپور کې د ۱۳سلنه تلفاتو نسبت بهرنیو ځواکونو ته شوی وو.
