کابل ټکی کام( دوشنبه، ۲۱زمری، ۱۳۹۸)
د لوی اختر په دوهمه شپه د پکتیا او لوګر په ولایتونو کې د ګډو ځواکونو شپنیو عملیاتو زیات ملکي تلفات اړولي دي.
د پکتیا له زرمت ولسوالۍ څخه رارسیدلي خبرونه ښیي چې تیره شپه د دې ولسوالۍ په ګولالکو سیمه کې امریکایي او کورنیو عسکرو چاپه وهلي چې له امله یې ځاني او مالي تلفات اوښتي دي.
د سیمې یو تن اوسیدونکی “یحیا” وایي چې د ګډو ځواکونو په دې عملیاتو کې لسګونه ولسي کسان وژل شوي چې په ټکو یې په وژل شویو کسانو کې اکثره محصلین وو او د اختر په رخصتۍ کورونو ته راغلي وو.
په ورته وخت کې تیره شپه په لوګر ولایت کې هم ګډو ځواکونو شپني عملیات ترسره کړي او ملکیانو ته یې زیان رسولی دی.
د سیمې یو تن اوسیدونکي کابل ټکي کام ته ویلي چې تیره شپه د لوګر او میدان وردګو په سرحدي سیمه توریخیلو او نهبورجه کې د ګډو ځواکونو په عملیاتو کې دوه تنه عام کلیوال او یو طالب وژل شوي دي.
د سرچینې په وینا چې د عملیاتو له امله د ولسي خلکو کورونه او زیات مالونه هم تخریب شوي دي.
دا په داسې حال کې ده چې د اختر له لومړۍ ورځې راهیسې طالبانو نااعلان شوی اوربند اعلان کړی او د هیواد په هېڅ کومه برخه کې یې له کوم بریده خبر نه دی ورکړی.
د یادونې وړ ده چې بهرني او کورني ځواکونه د هر اختر په شپو کې ورته عملیات ترسره کوي چې تول قربانیان یې ولسي وګړي وي.
