هندي کشمير کې د پوليسو او لاريونوالو تر منځ نښتې شوي
(کابل ټکی کام، ۱۳۹۸، وږی ۲)
د هند تر واک لاندې کشمير کې د پوليسو او لاريونوالو تر منځ نښته کې ګڼ شمير لاريوونکي ټپيان شوي دي.
رويټرز خبري اژانس ليکي، دغه نښتې د کشمير په لوی ښار سري نګر کې شوي چې لاريون کوونکو پر پوليسو د ډبرو وارونه کړي او پوليسو يې په ځواب کې اوښکې بهوونکی ګاز او مرمۍ کارولي.
دغه راز د کشمير په مشهور سوراښار کې هم پرون د جمعې تر لمانځه وروسته لاریونوالو د پاکستان پر پلوۍ او د هندوستان مرده باد شعارونه ورکړي چې په ترڅ کې د پوليسو او لاريونوالو نښته شوې ده.
په کشمير کې بيلتون غوښتونکو په لومړي ځل د لاريونونو پر مهال له هنده د بيلېدو شعارونه ورکړي.
له کله راهیسې چې هند کشمير ته ورکړل شوي ځانګړي اختيارات ختم کړي له هماغې راهيسې په کشمير کې د بیلتون غوښتونکو له خوا لاریونونه روان دي.
د هند تر واک لاندې کشمير ته هندوستان هر ډول مواصلات تړلي او رسنۍ وايي، چې شپږ لکه هندي پوځيان يې پکې ځای پر ځای کړي دي.
پرون د قتل عام د څار نړيوالې ادارې (جینوسايډواچ) په ملګرو ملتونو غږ کړی و چې کشمير کې دې د هندي ځواکونو له خوا د ممکنه قتل عام مخه ونيسي.
تر دې مخکې یادې ادارې په خپل راپور کې هندي ځواکونه په کشمير کې پر جنسي تيريو او د عام اولس سره پر زور زياتي تورن کړي و.
